સુરેન્દ્રનગર મહાનગરપાલિકાની તિજોરી છલકાઈ, એક જ વર્ષમાં 26.19 કરોડની ટેક્સ વસૂલાત

સુરેન્દ્રનગર મહાનગરપાલિકા બન્યા બાદ તંત્ર દ્વારા વેરા વસૂલાત બાબતે અત્યંત કડક વલણ અપનાવવામાં આવ્યું છે, જેના પરિણામે પાલિકાની તિજોરીમાં નાણાંનો ધોધ વહ્યો છે. છેલ્લા 1 વર્ષમાં મહાનગરપાલિકાએ કુલ 26.19 કરોડ રૂપિયાની ટેક્સ વસૂલાત કરીને અત્યાર સુધીનો સૌથી મોટો રેકોર્ડ સ્થાપિત કર્યો છે.

ખાસ કરીને માર્ચ મહિનામાં જ તંત્રએ આક્રમક કામગીરી કરી 3.33 કરોડ રૂપિયાની માતબર આવક મેળવી છે. અગાઉ જ્યારે નગરપાલિકા હતી ત્યારે અપૂરતી સુવિધાઓને કારણે લોકો ટેક્સ ભરવામાં આનાકાની કરતા હતા, પરંતુ હવે મહાનગરપાલિકાના દરજ્જા સાથે વહીવટી તંત્ર પણ એક્શન મોડમાં આવ્યું છે.

બાકી રહેલા 120 કરોડ રૂપિયાના લેણાં વસૂલવા માટે ડેપ્યુટી કમિશનરના આદેશથી 22 જેટલી સ્પેશિયલ ટીમો બનાવવામાં આવી છે. જે મિલકત ધારકો ટેક્સ ભરવામાં વિલંબ કરી રહ્યા છે તેમની સામે સીલિંગની કાર્યવાહી તેજ કરવામાં આવી છે. છેલ્લા એક મહિનામાં જ ટેક્સ ન ભરનારી 25 મિલકતોને સીલ મારી દેવામાં આવ્યું છે, જ્યારે અન્ય 74 મિલકતોને સીલ કરવાના આકરા હુકમો જારી કરી દેવાયા છે. તંત્રની આ કડકાઈને કારણે બાકીદારોમાં ફફડાટ વ્યાપી ગયો છે અને લોકો સામે ચાલીને વેરો ભરવા પહોંચી રહ્યા છે.

માર્ચ એન્ડિંગને ધ્યાનમાં રાખીને મહાનગરપાલિકાએ રજાના દિવસોમાં પણ કચેરી ખુલ્લી રાખવાનો મહત્વનો નિર્ણય લીધો છે. આગામી રમઝાન ઈદ, શનિ-રવિની રજાઓ, મહાવીર જયંતી અને રામનવમીના તહેવારોમાં પણ ટેક્સ બારીઓ ચાલુ રહેશે અને તમામ કર્મચારીઓની રજાઓ રદ કરવામાં આવી છે. મહાનગરપાલિકાનો લક્ષ્યાંક બાકી રહેલા 120 કરોડના આંકડાને મહત્તમ અંશે ઘટાડવાનો છે. આ રેકોર્ડબ્રેક વસૂલાતથી શહેરના વિકાસ કામોને વેગ મળશે તેવી આશા સેવાઈ રહી છે. શહેરીજનોને અપીલ કરવામાં આવી છે કે સીલિંગની કાર્યવાહીથી બચવા માટે વહેલી તકે પોતાનો બાકી વેરો જમા કરાવી દે.