વર્લ્ડ ઓરલ હેલ્થ ડે: દિવસમાં 2 વખત બ્રશ કરવું, મીઠી વસ્તુનો ઓછો ઉપયોગ કરવો

વિશ્વ મુખ સ્વાસ્થ્ય દિવસ (World Oral Health Day) નિમિત્તે ઇન્ડિયન ડેન્ટલ એસોસિએશન (IDA) સુરેન્દ્રનગર બ્રાન્ચ દ્વારા સામાજિક જવાબદારીના ભાગરૂપે વિશેષ ડેન્ટલ કેમ્પનું આયોજન કરવામાં આવ્યું હતું.

આ પ્રસંગે એસોસિએશનના નિષ્ણાત તબીબોએ સુરેન્દ્રનગર શહેર અને આસપાસના ગ્રામ્ય વિસ્તારોની સરકારી શાળાઓની મુલાકાત લીધી હતી. કાર્યક્રમ દરમિયાન મોટી સંખ્યામાં વિદ્યાર્થીઓના દાંતની તપાસ કરવામાં આવી હતી અને તેમને મુખના આરોગ્યનું મહત્વ સમજાવવામાં આવ્યું હતું.

ડેન્ટલ તબીબોએ બાળકોને માર્ગદર્શન આપતા જણાવ્યું હતું કે, મજબૂત દાંત માટે દિવસમાં 2 વખત બ્રશ કરવું અને મીઠી વસ્તુઓનો ઉપયોગ ટાળવો જોઈએ. આ ઉપરાંત, ડોક્ટરોએ દૂધિયા દાંતનું મહત્વ સમજાવી બાળપણથી જ દાંતની કાળજી રાખવા પર ભાર મૂક્યો હતો. દાંતમાં દુખાવો, કાળા ડાઘ કે દુર્ગંધ જેવી સમસ્યાઓને ગંભીરતાથી લઈ તાત્કાલિક ડોક્ટરનો સંપર્ક કરવા સૂચન અપાયું હતું. આ જાગૃતિ અભિયાનના અંતે તમામ વિદ્યાર્થીઓને પ્રોત્સાહન રૂપે ટૂથપેસ્ટ અને ટૂથબ્રશનું વિનામૂલ્યે વિતરણ કરવામાં આવ્યું હતું.