સાયલામાં દારૂની 40 બોટલ સાથે નિવૃત્ત આર્મી જવાન ઝડપાયો

સાયલા પોલીસ સ્ટાફ વડીયા ગામ પાસે પેટ્રોલિંગમાં હતો ત્યારે મળેલી બાતમીના આધારે એક શંકાસ્પદ કારને અટકાવવામાં આવી હતી. આ કારની તલાશી લેતા પાછળની ડેકીમાં રાખેલી સૂટકેસ અને થેલામાંથી વિદેશી દારૂની 40 બોટલો મળી આવી હતી.

પોલીસે 1,22,500 ની કિંમતનો દારૂ અને 5,00,000 ની કાર મળી કુલ 6,22,500 નો મુદ્દામાલ જપ્ત કર્યો છે. પકડાયેલ શખ્સની ઓળખ પ્રવીણભાઈ જેસીંગભાઇ રોજાસરા (રહે. કોરડા, તા. ચુડા) તરીકે થઈ છે, જે 8 મહિના પહેલા જ આર્મીમાંથી નિવૃત્ત થયા છે.

પૂછપરછમાં જાણવા મળ્યું છે કે તેઓ આર્મી કેન્ટીનમાંથી આ દારૂનો જથ્થો લાવ્યા હતા અને આણંદ તરફ જઈ રહ્યા હતા. સાયલામાં મિત્રને મળવા રોકાયા ત્યારે જ પોલીસના હાથે ઝડપાઈ ગયા હતા. નિયમ મુજબ તેમની પાસે માત્ર 5 બોટલ રાખવાની પરમિટ હતી, પરંતુ તેમની પાસે 40 બોટલોનો જથ્થો હતો અને તે સમયે પરમિટ પણ હાજર નહોતી. સાયલા પોલીસે ગુનો નોંધી આગળની તપાસ હાથ ધરી છે.