ચોટીલા સર્કિટ હાઉસમાં ડેપ્યુટી કલેક્ટરના દરોડા: ગેરકાયદેસર રોકાયેલા 4 શખ્સોની અટકાયત

સુરેન્દ્રનગર જિલ્લાના સુપ્રસિદ્ધ યાત્રાધામ ચોટીલામાં સરકારી સર્કિટ હાઉસમાં ચાલી રહેલી અનિયમિતતાઓ સામે ડેપ્યુટી કલેક્ટર હરેશ મકવાણાએ લાલ આંખ કરી છે.

લાંબા સમયથી એવી ફરિયાદો મળી રહી હતી કે, આરએન્ડબી (R&B) વિભાગના સંચાલન હેઠળના આ સરકારી ગેસ્ટ હાઉસમાં નિયમોનું ઉલ્લંઘન કરીને બિનસરકારી વ્યક્તિઓને આશરો આપવામાં આવે છે. આ બાતમીના આધારે ડેપ્યુટી કલેક્ટરે અચાનક દરોડા પાડીને તપાસ હાથ ધરતા વહીવટી તંત્રમાં ફફડાટ ફેલાયો છે.

તપાસ દરમિયાન સર્કિટ હાઉસના રૂમોમાં ગેરકાયદેસર રીતે રોકાયેલા 4 શખ્સો ઝડપાયા હતા. આ વ્યક્તિઓ પાસે રોકાણ માટેના કોઈ માન્ય પુરાવા કે સત્તાવાર મંજૂરી નહોતી.

ઝડપાયેલા શખ્સોમાં રાજકોટના ગારીડાના હરેશ માવજીભાઈ ધાડવી, ચોટીલાના ગુંદા ગામના હરેશ પોલાભાઈ વાઘેલા, રાજપરાના અરવિંદ પાંચાભાઇ ચાવડા અને ગુંદાના ગોરધનભાઈ જાદવભાઈ ચાવડાનો સમાવેશ થાય છે. આ તમામ લોકોને ઝડપી પાડી મામલતદાર સમક્ષ રજૂ કરવામાં આવ્યા છે અને તેમની સામે જામીનગીરી સહિતની કાયદેસરની કાર્યવાહી શરૂ કરાઈ છે.

ડેપ્યુટી કલેક્ટરે આ મામલે સર્કિટ હાઉસના જવાબદાર અધિકારીઓ અને કર્મચારીઓ સામે પણ કડક તપાસના આદેશ આપ્યા છે. સરકારી મિલકતનો દુરુપયોગ કરનારા તત્વો સામે આગામી દિવસોમાં પણ આવી ઝુંબેશ ચાલુ રહેશે તેવી ચીમકી આપવામાં આવી છે. આ કાર્યવાહીથી સરકારી આવાસમાં વગદાર લોકોના જોરે ઘૂસી જતાં તત્વોમાં ફફડાટ વ્યાપી ગયો છે.