લીંબડીના સમલા અને ખાંભલાઓમાંથી 92 લાખની ચોરી ઝડપાઈ

સુરેન્દ્રનગર જિલ્લામાં પીજીવીસીએલ (PGVCL) વિભાગ દ્વારા વીજચોરી અટકાવવા માટે મોટા પાયે સર્ચ ઓપરેશન હાથ ધરવામાં આવ્યું છે. તાજેતરમાં લીંબડીના સમલા અને ખાંભલાઓ ગામમાં વીજ કંપનીની 39 ટીમોએ પોલીસ અને SRP જવાનોના ચુસ્ત બંદોબસ્ત સાથે દરોડા પાડ્યા હતા.

આ કામગીરીમાં 16 SRP જવાનો અને 21 પોલીસ કર્મચારીઓને સાથે રાખીને વહેલી સવારથી જ ચેકિંગ શરૂ કરવામાં આવ્યું હતું, જેના કારણે વીજચોરોમાં ભારે ફફડાટ વ્યાપી ગયો હતો. સમલા ગામમાં તપાસ દરમિયાન ઘર વપરાશના 436 વીજ જોડાણો ચેક કરાયા હતા, જેમાંથી 48 જોડાણોમાં ગેરરીતિ જણાતા 47 લાખ રૂપિયાનો દંડ ફટકારવામાં આવ્યો છે. તેવી જ રીતે, ખાંભલાઓ ગામમાં પણ 326 વીજ કનેક્શન તપાસવામાં આવ્યા હતા, જેમાં રહેણાંક અને વાણિજ્યિક હેતુના કુલ 42 જોડાણોમાં ચોરી પકડાઈ હતી.

સમગ્ર ઓપરેશન દરમિયાન કુલ 782 વીજ જોડાણોની ચકાસણી કરવામાં આવી હતી, જેમાં કુલ 90 જેટલા જોડાણોમાં ગેરરીતિ સામે આવતા તંત્ર દ્વારા કુલ 92 લાખ રૂપિયાના દંડના બિલ ફટકારવામાં આવ્યા છે.