લીંબડી અને મુળી પોલીસ મથકના 2 નાસતા-ફરતા આરોપીઓ ઝડપાયા

સુરેન્દ્રનગર પેરોલ ફર્લો સ્ક્વોડની ટીમે અલગ-અલગ ગુનામાં નાસતા-ફરતા 2 આરોપીઓને ઝડપી પાડ્યા છે. લીંબડી તાલુકામાં પેટ્રોલિંગ દરમિયાન, પ્રોહિબિશનના ગુનામાં સંડોવાયેલા આરોપી જયદીપસિંહ ઉર્ફે જે.ડી. ધર્મેન્દ્રસિંહ રાણાને ભલગામડાના શક્તિ માતાજીના મંદિર પાસેથી દબોચી લેવાયો હતો.

જ્યારે બીજા ઓપરેશનમાં, મૂળી પોલીસ મથકના બળજબરીથી રૂપિયા પડાવવાના ગુનામાં છેલ્લા 1 વર્ષથી ફરાર આરોપી રાજદીપભાઈ જોરૂભા દેવરાને મોરબીના લાલપર પાસે આવેલી હોનેસ્ટ હોટલ નજીકથી હ્યુમન અને ટેકનિકલ સોર્સની મદદથી ઝડપી લેવાયો હતો. પેરોલ ફર્લો સ્ક્વોડે આ બંને આરોપીઓની અટકાયત કરીને કાયદેસરની કાર્યવાહી માટે સ્થાનિક પોલીસ સ્ટેશન સોંપ્યા છે.