લીંબડીમાં છ દિવસીય ‘સ્વદેશી મેળા’નો પ્રારંભ: સ્થાનિક હસ્તકલા અને વાનગીઓના સ્ટોલ આકર્ષણનું કેન્દ્ર

લીંબડી ભીમનાથ સોસાયટી પાસે નગરપાલિકા દ્વારા છ દિવસીય ‘સ્વદેશી મેળો – શોપિંગ ફેસ્ટિવલ’નું શાનદાર આયોજન કરવામાં આવ્યું છે. ‘વોકલ ફોર લોકલ’ અભિયાનને વેગ આપવાના ઉદ્દેશ્ય સાથે યોજાયેલા આ મેળાનું ઉદ્ઘાટન સૌરાષ્ટ્ર નિમ્બાર્ક પીઠના મહંત લાલદાસજી બાપુ અને નગરપાલિકા પ્રમુખ રઘુભાઈ પટેલ સહિતના અગ્રણીઓના હસ્તે કરવામાં આવ્યું હતું.

આ મેળામાં સ્થાનિક કારીગરો દ્વારા નિર્મિત હાથે વણેલા કાપડ, ભરતકામ, માટીના કલાત્મક વાસણો, શુદ્ધ મસાલા અને ખેતીની પેદાશોના અનેક સ્ટોલ્સ ઊભા કરવામાં આવ્યા છે. કાઠિયાવાડી સંસ્કૃતિની પરંપરાગત વાનગીઓ અને ગૃહ ઉદ્યોગની ચીજવસ્તુઓ લોકોમાં આકર્ષણનું કેન્દ્ર બની છે. આ આયોજનથી મધ્યસ્થીઓ વિના કારીગરોને સીધું બજાર મળ્યું છે, જેનાથી સ્થાનિક અર્થતંત્રને મજબૂતી મળશે. લીંબડીના શહેરીજનો પણ વિદેશી વસ્તુઓના બદલે સ્વદેશી ચીજોની ખરીદી કરી આ ઉમદા પ્રયાસને પ્રોત્સાહન આપી રહ્યા છે.