લીંબડીમાં ભારે પવનથી પદયાત્રી સેવા કેમ્પનો મંડપ તૂટ્યો: આરામ કરી રહેલા બે યાત્રિકો દબાયા

ચૈત્રી પૂનમ નિમિત્તે અમદાવાદ, વડોદરા અને આસપાસના વિસ્તારોમાંથી હજારો ભક્તો પગપાળા ચોટીલા જઈ રહ્યા છે. આ પદયાત્રીઓની સુવિધા માટે સેવાભાવી સંસ્થાઓ દ્વારા હાઈવે પર રહેવા, જમવા અને મેડિકલ કેમ્પનું આયોજન કરવામાં આવ્યું છે.

દરમિયાન સાંજના સમયે અચાનક વાતાવરણમાં પલટો આવતા અને ફૂંકાયેલા તેજ પવનને કારણે લીંબડી નેશનલ હાઈવે પર છાલિયા તળાવ પાસે પદયાત્રીઓ માટે ઉભા કરવામાં આવેલા સેવા કેમ્પના મંડપના લોખંડના એંગલો અને કાપડ ધરાશાયી થઈ ગયા હતા.

આ દુર્ઘટના સમયે કેમ્પમાં આરામ કરી રહેલા બે પદયાત્રીઓ મંડપ નીચે દબાઈ જતાં તેમને ગંભીર ઈજાઓ પહોંચી છે. ઈજાગ્રસ્તોને તાત્કાલિક અસરથી સારવાર માટે લીંબડીની R.R. હોસ્પિટલ ખાતે ખસેડવામાં આવ્યા છે, જ્યાં ડોક્ટરો દ્વારા તેમની સઘન સારવાર શરૂ કરવામાં આવી છે.

મંડપ તૂટી પડવાની આ ઘટનાને પગલે કેમ્પમાં આરામ કરી રહેલા અન્ય પદયાત્રીઓમાં પણ ભારે ફફડાટ અને ભયનો માહોલ જોવા મળ્યો હતો. સેવાભાવી કાર્યકરો અને સ્થાનિક લોકોએ તાત્કાલિક બચાવ કામગીરી હાથ ધરી ઈજાગ્રસ્તોને બહાર કાઢ્યા હતા. હાલમાં વાતાવરણની અનિશ્ચિતતાને જોતા હાઈવે પરના અન્ય સેવા કેમ્પના સંચાલકોને પણ સાવચેત રહેવા સૂચના અપાઈ છે. પદયાત્રીઓને પણ ખુલ્લા મેદાન કે મજબૂત આશ્રયસ્થાનમાં રોકાણ કરવા વિનંતી કરવામાં આવી છે.