ધ્રાંગધ્રા-સુરેન્દ્રનગર રોડ પર ડમ્પર ચાલકે રિવર્સમાં બાઈકને અડફેટે લેતા પિતા-પુત્ર ઈજાગ્રસ્ત

સુરેન્દ્રનગર જિલ્લામાં માર્ગ અકસ્માતોની સંખ્યામાં ચિંતાજનક વધારો થઈ રહ્યો છે. તાજેતરમાં ધ્રાંગધ્રા-સુરેન્દ્રનગર રોડ પર કાપેલી ધાર પાસે એક અજાણ્યા ડમ્પર ચાલકે બેદરકારીપૂર્વક ડમ્પર રિવર્સમાં લેતા બાઈક સવાર પિતા-પુત્રને અડફેટે લીધા હતા.

આ અકસ્માતમાં ધ્રાંગધ્રાના હરીપર રોડ પર રહેતા અલ્કેશભાઈ લખુભાઈ ધ્રાંગધરિયા અને તેમના પુત્ર નીલને શરીરના ભાગે ઈજાઓ પહોંચી છે. ઘટનાની ગંભીરતા જોતા ભોગ બનનાર પરિવારે ડમ્પર ચાલક વિરુદ્ધ પોલીસ મથકે ફરિયાદ નોંધાવી છે.

પોલીસ સૂત્રો પાસેથી મળતી માહિતી મુજબ, અલ્કેશભાઈ તેમના પુત્ર અને માતા સાથે ધોળી ગામેથી બાઈક પર પરત ફરી રહ્યા હતા. કાપેલી ધાર પાસે રસ્તા પર ડમ્પર ઉભું હોવાથી તેમણે પોતાનું વાહન થોભાવી દીધું હતું, પરંતુ ડમ્પર ચાલકે અચાનક પાછળ જોયા વગર રિવર્સ લેતા ડમ્પરનું ટાયર બાઈક પર ચડી ગયું હતું. સદનસીબે મોટી જાનહાનિ ટળી હતી, પરંતુ પિતા-પુત્રને સારવારની જરૂર પડી હતી. ધ્રાંગધ્રા તાલુકા પોલીસે આ મામલે અજાણ્યા ડમ્પર ચાલક વિરુદ્ધ ગુનો નોંધી વધુ તપાસ અને તેની શોધખોળ હાથ ધરી છે.