ચોટીલા નગરપાલિકામાં વહીવટદાર શાસન: ડેપ્યુટી કલેક્ટર હરેશ મકવાણાએ ચાર્જ સંભાળ્યો

સુરેન્દ્રનગર જિલ્લાની ચોટીલા નગરપાલિકામાં ચૂંટાયેલા પ્રતિનિધિઓની ટર્મ પૂર્ણ થતા હવે વહીવટદાર શાસન અમલી બન્યું છે. ચોટીલાના ડેપ્યુટી કલેક્ટર હરેશ મકવાણાએ વહીવટદાર તરીકેનો પદભાર સંભાળી લીધો છે.

ચાર્જ સંભાળતાની સાથે જ તેમણે નગરપાલિકાના વિવિધ વિભાગોના અધિકારીઓ અને કર્મચારીઓ સાથે એક મહત્વપૂર્ણ બેઠક યોજી હતી. આ બેઠકમાં તેમણે સ્પષ્ટ સૂચના આપી હતી કે નાગરિકોને પાયાની સુવિધાઓ જેવી કે સ્વચ્છતા, પાણી પુરવઠો અને માર્ગ વ્યવસ્થા બાબતે કોઈ પણ ફરિયાદ મળવી જોઈએ નહીં.

વહીવટદારે પ્રથમ તબક્કામાં નગરપાલિકા દ્વારા ચાલી રહેલા તમામ વિકાસના કામોની વિગતવાર યાદી મંગાવી છે અને કામગીરીની સમીક્ષા શરૂ કરી છે. તેમણે જણાવ્યું હતું કે સરકારી યોજનાઓનો લાભ છેવાડાના નાગરિક સુધી પારદર્શક રીતે પહોંચવો જોઈએ.

વહીવટમાં કોઈ પણ પ્રકારની ગેરરીતિ કે ગેરવહીવટ ચલાવી લેવામાં આવશે નહીં તેવી કડક તાકીદ પણ કરવામાં આવી છે. હરેશ મકવાણાએ જાહેર સેવાઓને વધુ અસરકારક બનાવવા અને સમયમર્યાદામાં કામગીરી પૂર્ણ કરવા પર ભાર મૂક્યો હતો. અધિકારીઓને નાગરિક સુવિધાઓમાં સુધારો કરવા માટે જરૂરી માર્ગદર્શન પૂરું પાડી કામગીરીને વેગ આપવા જણાવ્યું છે.