થાનના યુવાન સાથે ક્રેડિટ કાર્ડ ચાર્જ બંધ કરાવવાના બહાને ₹87,980ની છેતરપિંડી

થાનમાં રહેતા એક યુવાન સાથે ઓનલાઈન છેતરપિંડીનો ચોંકાવનારો કિસ્સો સામે આવ્યો છે. થાનના આઝાદ ચોક વિસ્તારમાં રહેતા 32 વર્ષીય અજયભાઈ વિનયકાંતભાઈ વોરા, જેઓ વિજય ઈન્વેસ્ટમેન્ટમાં નોકરી કરે છે, તેમને 13-2-2026ના રોજ એક અજાણ્યા નંબર પરથી ફોન આવ્યો હતો.

ફોન કરનાર શખ્સે હિન્દીમાં વાત કરી ક્રેડિટ કાર્ડ પર લાગતો વાર્ષિક ચાર્જ બંધ કરી દેવાની લાલચ આપી હતી. વિશ્વાસ જીતવા માટે ઠગે પોતાનું નકલી આઈડી કાર્ડ પણ વોટ્સએપ પર મોકલ્યું હતું.

ત્યારબાદ આ ઠગે એક APK ફાઈલ મોકલી હતી. શરૂઆતમાં પ્રોસેસ ન થતા, બીજા દિવસે ફરી ફોન કરીને અજયભાઈને જ તે ફાઈલ ખોલવા દબાણ કર્યું હતું. અજયભાઈએ જેવી આ ફાઈલ ડાઉનલોડ કરીને ક્રેડિટ કાર્ડની વિગતો ભરી, તરત જ તેમનો ફોન હેક થઈ ગયો હતો.

ગણતરીની મિનિટોમાં જ તેમના બેંક ખાતામાંથી કુલ 87,980 ઉપડી ગયા હોવાના મેસેજ આવવા લાગ્યા હતા. આ મામલે અજયભાઈએ સાયબર ક્રાઈમ હેલ્પલાઈન અને થાન પોલીસ મથકે ફરિયાદ નોંધાવી છે, જેની વધુ તપાસ PI એન. એસ. પરમાર ચલાવી રહ્યા છે.