મોરથાળા ગામની શાળામાં શિક્ષકોની ઘટથી વિદ્યાર્થીઓના અભ્યાસ પર અસર

Morthala School Teacher Shortage | થાન તાલુકાના મોરથાળા ગામની પ્રાથમિક શાળામાં શિક્ષકોની ઘટને કારણે 600 જેટલા વિદ્યાર્થીઓના અભ્યાસ પર ગંભીર અસર પડી રહી છે. થાનથી 7 km દૂર આવેલી આ શાળામાં ધોરણ 1 થી 8 ના વિદ્યાર્થીઓ માટે માત્ર 10 થી 12 શિક્ષકો જ ફરજ બજાવી રહ્યા છે.

મોરથાળા ઉપરાંત આસપાસના સારસાણા, સરોડી, અનંતપર અને લાખા ગામના બાળકો પણ અહીં અભ્યાસ અર્થે આવે છે, પરંતુ પૂરતા શિક્ષકોના અભાવે અભ્યાસક્રમ સમયસર પૂરો થવામાં ભારે મુશ્કેલી સર્જાઈ રહી છે.

હાલ શાળામાં રૂ. 3 કરોડના ખર્ચે નવું બિલ્ડિંગ તૈયાર થઈ રહ્યું છે, ત્યારે વાલીઓ અને ગ્રામજનોની માંગ છે કે નવી ઇમારતની સાથે પૂરતા શિક્ષકોની પણ વહેલી તકે નિમણૂક કરવામાં આવે.

આ ઉપરાંત, ગામમાં ધોરણ 9 થી આગળના અભ્યાસ માટે માધ્યમિક શાળા શરૂ કરવાની પણ રજૂઆત કરવામાં આવી છે.

હાલ વિદ્યાર્થીઓને ઉચ્ચ શિક્ષણ માટે રોજ થાન જવું પડે છે. થાન તાલુકા પંચાયત સભ્ય સહિત સ્થાનિક આગેવાનોએ શિક્ષણ વિભાગને રજૂઆત કરી મોરથાળા શાળામાં ઘટતી શિક્ષકોની જગ્યાઓ ત્વરિત ભરવા માંગ ઉઠાવી છે.