દસાડામાં ગાડીમાંથી 7.93 લાખનો વિદેશી દારૂ ઝડપાયો, ભચાઉના શખ્સની ધરપકડ

સુરેન્દ્રનગર જિલ્લાની દસાડા પોલીસે વિદેશી દારૂની હેરાફેરીના મોટા નેટવર્કનો પર્દાફાશ કર્યો છે. પોલીસને ચોક્કસ બાતમી મળી હતી કે, કાળા રંગની હ્યુન્ડાઈ ક્રેટા ગાડી (નંબર GJ-01-RL-6080) માં વિદેશી દારૂનો મોટો જથ્થો લઈ જવામાં આવી રહ્યો છે.

આ માહિતીના આધારે પોલીસે વોચ ગોઠવી ગાડીને આંતરી તપાસ કરતા તેમાંથી મોટી માત્રામાં દારૂની બોટલો મળી આવી હતી. આ કાર્યવાહી દરમિયાન પોલીસે ભચાઉના કાકરવા ગામના હિતેશભાઈ વાલજીભાઇ મણકા નામના આરોપીને ઝડપી પાડ્યો છે, જ્યારે રાપરનો મુન્નાભાઈ શોઢા નામનો અન્ય એક શખ્સ પોલીસને ચકમો આપી ફરાર થઈ ગયો છે.

પોલીસે ઘટનાસ્થળેથી 5,00,000 રૂપિયાની કિંમતની ક્રેટા કાર, બે મોબાઈલ ફોન અને દારૂની બોટલો મળી કુલ 7,93,500 રૂપિયાનો મુદ્દામાલ જપ્ત કર્યો છે. દસાડા પોલીસ સ્ટેશનના ઇન્ચાર્જ PI વી.આઇ. ખડીયાએ આ મામલે ગુનો નોંધી ફરાર આરોપીને પકડવા ચક્રો ગતિમાન કર્યા છે.