પાટડી સેવા સદનમાં વોટર કૂલર બંધ રહેતા અરજદારોને ભર ઉનાળે પીવાના પાણી માટે ફાંફા

સુરેન્દ્રનગર જિલ્લાના પાટડી સેવા સદન ખાતે તંત્રની ઘોર બેદરકારી સામે આવી છે. ઝાલાવાડમાં ગરમીનો પારો 40 ડિગ્રીને પાર પહોંચ્યો છે, ત્યારે દસાડા તાલુકાના 90 થી વધુ ગામોમાંથી આવતા અરજદારો પીવાના પાણી માટે વલખાં મારી રહ્યા છે.

સેવા સદનમાં લાખોના ખર્ચે મુકવામાં આવેલા વોટર કૂલર છેલ્લા ઘણા સમયથી બંધ હાલતમાં હોવાથી અરજદારોને બહારથી મોંઘા ભાવે પાણીની બોટલો ખરીદવાની નોબત આવી છે.

પીવાના પાણીની સમસ્યા ઉપરાંત, કચેરીમાં બેઠક વ્યવસ્થાનો પણ ભારે અભાવ જોવા મળી રહ્યો છે. પૂરતી ખુરશીઓ ન હોવાને કારણે દૂર-દૂરથી આવતા સિનિયર સિટીઝન અને મહિલા અરજદારો કાળઝાળ ગરમીમાં જમીન પર બેસવા મજબૂર બન્યા છે.

વકીલો માટે પણ કોઈ અલગ બેઠક વ્યવસ્થા ઉપલબ્ધ નથી. કરોડોના ખર્ચે બનેલા આધુનિક સેવા સદનમાં પ્રાથમિક સુવિધાઓના નામે મીંડું હોવાથી સ્થાનિકોમાં રોષ વ્યાપ્યો છે. અરજદારોની માંગ છે કે જવાબદાર તંત્ર વહેલી તકે વોટર કૂલર રિપેર કરાવે અને પીવાના પાણી તેમજ બેઠક વ્યવસ્થા જેવી પાયાની જરૂરિયાતો પૂરી પાડે.