સુરેન્દ્રનગરમાં પ્રતિબંધિત ઉંદર પકડવાની જાળ વેચતા રાજ સ્ટોરના માલિક સામે કાર્યવાહી

સુરેન્દ્રનગર (Surendranagar) એસ.ઓ.જી. પોલીસ (SOG Police) દ્વારા શહેરી વિસ્તારોમાં જિલ્લા કલેક્ટરના જાહેરનામાનું પાલન કરાવવા માટે કડક ચેકિંગ કામગીરી હાથ ધરવામાં આવી છે.

ઉંદર પકડવા તેમજ તેને મારવા માટેની દવા અને જાળ જેવા સાધનોના વેચાણ પર જિલ્લા કલેક્ટર દ્વારા પ્રતિબંધ મૂકવામાં આવ્યો હોવા છતાં, કેટલાંક વેપારીઓ દ્વારા આ નિયમનો ભંગ કરવામાં આવી રહ્યો હોવાની વિગતો સામે આવી હતી.

ચેકિંગ દરમિયાન સુરેન્દ્રનગર શહેરના કાંતિ કોટન મિલ પાસે આવેલ રાજ સ્ટોર (Raj Store) ઉપર પોલીસે દરોડો પાડ્યો હતો. આ કાર્યવાહી દરમિયાન દુકાનમાંથી ઉંદર પકડવાની જાળ (Rat Traps) કુલ 19 નંગ મળી આવી હતી, જેની આશરે કિંમત 2,850 રૂપિયાનો મુદ્દામાલ જપ્ત કરવામાં આવ્યો હતો.

આ મામલે દુકાન માલિક મૂર્તુજા ધંધુકાવાળા વિરુદ્ધ ગુનો દાખલ કરી કાયદેસરની કાર્યવાહી કરવામાં આવી છે. આ અંગે સીટી એ ડિવિઝન પોલીસ સ્ટેશન (City A Division Police Station) ખાતે ગુનો નોંધીને આગળની તપાસ હાથ ધરવામાં આવી છે.

પોલીસે વધુમાં સ્પષ્ટ સૂચના આપી છે કે કલેક્ટરના જાહેરનામાનો ભંગ કરીને પ્રતિબંધિત વસ્તુઓનું વેચાણ કરનાર અન્ય કોઈ પણ વેપારી સામે પણ આગામી સમયમાં કડક પગલાં ભરવામાં આવશે.