પાકિસ્તાનમાં અનોખો ટેક્સ: ગાય-ભેંસ પાળવા પર દરરોજ ચૂકવવા પડશે 30 રૂપિયા, વિપક્ષે ગણાવ્યો ‘ગોબર ટેક્સ’

પાકિસ્તાન (Pakistan) ના પંજાબ પ્રાંતમાં મરિયમ નવાઝની સરકાર હવે પશુપાલકો પર નવો બોજ નાખવાની તૈયારી કરી રહી છે. રિપોર્ટ અનુસાર, પંજાબ સરકાર હવે ગાય અને ભેંસ પાળવા પર દરરોજ 30 પાકિસ્તાની રૂપિયાની ફી વસૂલવાનો નિયમ બનાવી શકે છે. વિપક્ષી દળોએ આ પગલાની આકરી ટીકા કરી છે અને તેને ‘ગોબર ટેક્સ’ (Gobar Tax) નામ આપ્યું છે.

ગ્રીન એનર્જીના નામે વસૂલાત: સરકાર આ યોજનાને ‘સુથરા પંજાબ’ (Suthra Punjab) બાયોગેસ પ્રોગ્રામના ભાગરૂપે રજૂ કરી રહી છે. સરકારનો દાવો છે કે આ ફી દ્વારા એકત્ર કરાયેલા નાણાંનો ઉપયોગ ગોબર એકઠું કરવા, વેસ્ટ મેનેજમેન્ટ (Waste Management) અને બાયોગેસ પ્લાન્ટ (Biogas Plant) ચલાવવા માટે કરવામાં આવશે. આનાથી પર્યાવરણને ફાયદો થશે તેવી દલીલ સરકાર કરી રહી છે.

પશુપાલકો પર આર્થિક બોજ: આ યોજના હેઠળ પંજાબની અંદાજે 168 કેટલ કોલોનીઓ (Cattle Colonies) ના 50 લાખથી વધુ પશુઓ પર આ ફી લાદવામાં આવી શકે છે. પ્રાથમિક તબક્કે લાહોરની બે મુખ્ય ડેરી કોલોનીઓથી તેની શરૂઆત થશે. ગણતરી મુજબ, પશુપાલકે વર્ષે એક પશુ દીઠ આશરે 11,000 પાકિસ્તાની રૂપિયા સરકારને ચૂકવવા પડશે.

વિપક્ષ અને ખેડૂતોનો વિરોધ: વિપક્ષનું કહેવું છે કે સરકાર આર્થિક સંકટમાં હોવાથી હવે રેવન્યુ (Revenue) એકત્ર કરવા માટે આવા વિચિત્ર રસ્તાઓ અપનાવી રહી છે. ખેડૂતો અને પશુપાલકો પહેલેથી જ મોંઘા ઘાસચારા અને વીજળીના ભાવથી પરેશાન છે, ત્યારે આ નવો ટેક્સ તેમની કમર તોડી નાખશે. ઈન્ડસ્ટ્રી એક્સપર્ટ્સ (Industry Experts) ના મતે, જ્યારે નેતાઓ લક્ઝરી સુવિધાઓ ભોગવે છે, ત્યારે સામાન્ય ખેડૂત પાસે પશુઓના ગોબર માટે પણ પૈસા માંગવા તે સિસ્ટમની નિષ્ફળતા દર્શાવે છે. જોકે, સરકારનો દાવો છે કે ખેડૂતો આ સર્વિસ ફી (Service Fee) આપવા માટે તૈયાર છે.