મુળી APMC ચૂંટણી: ખેડૂત વિભાગની 10 બેઠકો પર 11 ઉમેદવારો મેદાનમાં

Muli APMC Election | મુળી ખેતીવાડી ઉત્પન્ન બજાર સમિતિની ચૂંટણી (Muli APMC Election) જાહેર થતાં સ્થાનિક રાજકારણમાં ગરમાવો ફેલાયો છે. મુળી APMC ની ચૂંટણીમાં ખેડૂત વિભાગની 10 અને વેપારી વિભાગની 4 બેઠકો મળી કુલ ચૂંટણી યોજાનાર છે.

આવતીકાલ બુધવાર તા. 2-9-2026ના રોજ ફોર્મ પરત ખેંચવાનો અંતિમ દિવસ છે. જ્યારે આગામી તા. 9-9-2026ના રોજ મતદાન અને તા. 10-9-2026ના રોજ મત ગણતરી હાથ ધરવામાં આવશે.

ખેડૂત વિભાગની 10 બેઠકો પર 11 ઉમેદવારોએ 12 ફોર્મ ભર્યા છે. આ વિભાગમાં 163 મતદારો મતદાન કરનાર છે. બીજી તરફ વેપારી વિભાગની 4 બેઠક માટે 1 જ ઉમેદવારી પત્ર ભરાયું છે, જેમાં 3 મતદારો નોંધાયેલા છે. ખેડૂત વિભાગમાં પણ તમામ બેઠકો બિનહરીફ થાય તે માટે અંતિમ ઘડી સુધી તનતોડ પ્રયાસો હાથ ધરાશે.

મુળી યાર્ડની ચૂંટણીમાં ઝંપલાવનાર ઉમેદવારોમાં ખેડૂત વિભાગમાં (1) પરમાર હરદેવસિંહ જેઠુભા, (2) વાઘેલા બ્રીજરાજસિંહ વિક્રમસિંહ, (3) પરમાર અનિરૂદ્ધસિંહ દીલીપસિંહ, (4) પરમાર જયપાલસિંહ બળવંતસિંહ, (5) પરમાર યુવરાજસિંહ અજીતસિંહ, (6) સંતોલા કનુભાઈ પ્રભુભાઈ,  (7) ઝેઝરીયા ધીરૂભાઈ કેહાભાઈ, (8) ચૌહાણ રામસંગભાઈ હરીભાઈ, (9) વરમોરા રમણીકભાઈ રામજીભાઈ (10) કરપડા રામભાઈ મોકાભાઈએ ઉમેદવારી કરી છે, જ્યારે (11) પરમાર પ્રધુમનસિંહ મેરૂભા (12) પરમાર લક્ષ્મણસિંહ દાદુભાએ ઉમેદવારી ફોર્મ ભર્યું છે.

ચૂંટણી અધિકારી અને જિલ્લા રજિસ્ટ્રાર કોમલબેન ચૌધરી તેમજ નીંકુલગીરી ગોસ્વામી દ્વારા આ ચૂંટણીની સમગ્ર કાર્યવાહી હાથ ધરવામાં આવી રહી છે. 28-7-2026ના રોજ આખરી મતદાર યાદી પ્રસિદ્ધ કરાયા બાદ આજે ફોર્મ પરત ખેંચવાના અંતિમ દિવસે મૂળી APMCમાં ઇલેક્શનના (Election) બદલે સિલેક્શન (Selection) થઈ જાય તેવા પૂરતા પ્રયાસો ચાલી રહ્યા છે.