Accident: લીંબડીના જાખણ પાસે બંધ ટ્રક પાછળ 108 એમ્બ્યુલન્સ ઘૂસી, બે ઈજાગ્રસ્ત

Limbdi Highway Accident | અમદાવાદ-રાજકોટ નેશનલ હાઈવે પર એક ગંભીર અકસ્માત (Accident)ની ઘટના સામે આવી છે. લીંબડી તાલુકાના જાખણ ગામના પાટિયા પાસે હાઈવે પર ઉભેલી એક બંધ ટ્રક પાછળ પાણશીણા વિસ્તારની 108 એમ્બ્યુલન્સ ધડાકાભેર ઘૂસી ગઈ હતી.

આ અકસ્માત (Accident) એટલો જોરદાર હતો કે, એમ્બ્યુલન્સના આગળના ભાગનો કચ્ચરઘાણ નીકળી ગયો હતો. સદ્દનસીબે અકસ્માત સમયે એમ્બ્યુલન્સમાં કોઈ દર્દી સવાર ન હોવાને કારણે મોટી જાનહાનિ ટળી હતી.

આ દુર્ઘટનામાં એમ્બ્યુલન્સના પાયલોટ (ડ્રાઇવર) સહિત ગાડીમાં સવાર 2 વ્યક્તિઓને શરીરે નાની-મોટી ઈજાઓ પહોંચી હતી. અકસ્માત થતાં જ આસપાસના સ્થાનિક લોકો અને વાહનચાલકો તાત્કાલિક મદદ માટે દોડી આવ્યા હતા. લોકોએ બંને ઇજાગ્રસ્તોને એમ્બ્યુલન્સમાંથી બહાર કાઢીને સારવાર અર્થે નજીકની હોસ્પિટલમાં ખસેડ્યા હતા.

અકસ્માતના પગલે હાઈવે પર વાહનોની લાંબી લાઈનો લાગી ગઈ હતી. અને ટ્રાફિકજામના દ્રશ્યો સર્જાયા હતા. ઘટનાની જાણ થતાં જ સ્થાનિક પોલીસ કાફલો સ્થળ પર પહોંચ્યો હતો. અને અકસ્માતગ્રસ્ત વાહનોને રોડની બાજુ પર ખસેડીને વાહનવ્યવહાર ફરી પૂર્વવત કરાવ્યો હતો.