સુરેન્દ્રનગર સ્પેશિયલ ઓપરેશન ગ્રુપ (SOG) દ્વારા સોશિયલ મીડિયા પ્લેટફોર્મ પર હથિયાર સાથે ફોટા મૂકી રોફ જમાવતા તત્વો સામે લાલ આંખ કરવામાં આવી છે.
SOG સ્ટાફના પોલીસ કોન્સ્ટેબલ સાહિલભાઈને મળેલી ચોક્કસ બાતમીના આધારે, હથિયાર સાથે પ્રદર્શન કરનારા શખ્સની ઊંડાણપૂર્વક તપાસ હાથ ધરવામાં આવી હતી. આ કાર્યવાહી દરમિયાન દસાડા તાલુકાના કઠાડા ગામના 25 વર્ષીય હિમાલયભાઈ ભરતભાઈ વણોલ નામના શખ્સની અટકાયત કરવામાં આવી છે.
પૂછપરછ દરમિયાન આરોપીએ કબૂલાત કરી હતી કે તેણે આશરે 7 વર્ષ પહેલાં હથિયાર સાથે ફોટા પડાવીને સોશિયલ મીડિયા પર અપલોડ કર્યા હતા. વધુ તપાસમાં બહાર આવ્યું કે આ હથિયાર તેના જ ગામના મોહનભાઈ ભવાનભાઈ વણોલનું હતું.
કાયદાના ભંગ બદલ પોલીસે આ બંને ઇસમો વિરુદ્ધ દસાડા પોલીસ સ્ટેશનમાં આર્મ્સ એક્ટની વિવિધ કલમો હેઠળ ગુનો દાખલ કર્યો છે.
ઉલ્લેખનીય છે કે, હથિયારોના ગેરકાયદેસર પ્રદર્શન અને સોશિયલ મીડિયા પર તેના પ્રચારને રોકવા માટે પોલીસ દ્વારા આ સઘન ઝુંબેશ ચલાવવામાં આવી રહી છે. પકડાયેલા શખ્સ સામે કાયદેસરની કાર્યવાહી હાથ ધરી હથિયારના સ્ત્રોત અંગે વધુ તપાસ શરૂ કરવામાં આવી છે.
