સુરેન્દ્રનગર: મૂળીના ગઢાદ ગામે વીજ ટ્રાન્સફોર્મર ચોરતી આખી ગેંગને ગ્રામજનોએ રંગેહાથ ઝડપી પાડી

Transformer Theft Gang Caught | સુરેન્દ્રનગર (Surendranagar) જિલ્લામાં છેલ્લા કેટલાક સમયથી વીજ ઉપકરણો, વીજ ટ્રાન્સફોર્મર (TC), લોખંડની એંગલો અને વાયરની ચોરીના બનાવોમાં ચિંતાજનક વધારો થયો છે. તસ્કરો દ્વારા ખાસ કરીને રાત્રિના સમયે ખેડૂતોના ખેતરોમાંથી કિંમતી વીજ ટ્રાન્સફોર્મર ચોરી (Transformer Theft) જવાની ઘટનાઓ મોટા પ્રમાણમાં બનતી હતી.

આ ચોર ટોળકી પોલીસ પકડથી દૂર રહેતી હોવાથી, આખરે મૂળી તાલુકાના ગઢાદ (Gadhad Village, Ta. Muli) ગામે ખેડૂતો અને ગ્રામજનોએ રાત્રિ જાગરણ કરી વોચ ગોઠવી હતી. ગ્રામજનોની સતર્કતાના કારણે વીજ ઉપકરણોની ચોરી કરતી આખી ગેંગને (Gang) રંગેહાથ ઝડપી પાડવામાં મોટી સફળતા મળી છે.

ગઢાદ ગામના સરપંચ અને સ્થાનિક લોકોએ પકડાયેલા આરોપીઓનો વીડિયો બનાવીને વીજ તંત્રના અધિકારીઓ તેમજ મૂળી પોલીસને જાણ કરી હતી.

પીજીવીસીએલના (PGVCL) ડેપ્યુટી ઈજનેર સાપરાના જણાવ્યા મુજબ, આ મામલે મૂળી પોલીસ સ્ટેશનમાં (Police Station) ફરિયાદ (FIR) દાખલ કરવામાં આવી છે.

પ્રાથમિક પૂછપરછમાં આ ગેંગ દ્વારા લાખો રૂપિયાના લોખંડ, વાયર, એંગલ અને ઓઈલની ચોરીની કબૂલાત કરવામાં આવી છે, જેનાથી જિલ્લામાં થયેલી અનેક ચોરીઓનો પર્દાફાશ થયો છે.

પોલીસ તપાસમાં સામે આવ્યું છે કે આ ગેંગ ચલાવનાર મુખ્ય સૂત્રધાર રણજીત નામનો શખ્સ છે, જે મુળીના રામપરડા (Ramparda Village, Ta. Muli) ગામનો રહેવાસી છે અને તે નામચીન બુટલેગર (Bootlegger) તરીકે પોલીસ ચોપડે પણ ચડી ચૂકેલો છે. આ ગેંગ છેલ્લા 17 માસથી સક્રિય હતી અને તેમાં અલગ-અલગ ગામના સાગરીતો જોડાયેલા છે.

ખેતરોમાંથી ચોરાયેલા આ વીજ ટ્રાન્સફોર્મરનો ઉપયોગ ગેરકાયદેસર ખનીજચોરી (Illegal Mining) કરતી ખાણો પર વીજળી મેળવવા માટે થતો હતો. જો પોલીસ દ્વારા આ મામલે તટસ્થ તપાસ કરવામાં આવે, તો સોલાર પાવર પ્રોજેક્ટ (Solar Power Project) અને પવનચક્કીના (Windmill) વિસ્તારોમાં થયેલી મોટી ચોરીઓ સહિત અનેક મોટા ખનીજ માફિયાઓના નામો બહાર આવે તેવી પૂરેપૂરી શક્યતા છે.