સુરેન્દ્રનગરમાં કલેક્ટરના અધ્યક્ષસ્થાને સમીક્ષા બેઠક, આચારસંહિતાના અમલ માટે આદેશ

સુરેન્દ્રનગર જિલ્લામાં એપ્રિલ 2026 દરમિયાન યોજાનારી મહાનગરપાલિકા, જિલ્લા અને તાલુકા પંચાયતોની સામાન્ય ચૂંટણીઓને લઈને જિલ્લા વહીવટી તંત્ર એક્શન મોડમાં આવ્યું છે.

ચૂંટણી પ્રક્રિયા મુક્ત, નિષ્પક્ષ અને પારદર્શક રીતે સંપન્ન થાય તે હેતુથી જિલ્લા ચૂંટણી અધિકારી અને કલેક્ટર જી.એચ. સોલંકીના અધ્યક્ષસ્થાને નોડલ અધિકારીઓની મહત્વની સમીક્ષા બેઠક યોજાઈ હતી. આ બેઠકમાં આદર્શ આચારસંહિતાના કડક અમલ અને ચૂંટણીલક્ષી વિવિધ કામગીરીના સુચારુ આયોજન પર વિશેષ ભાર મૂકવામાં આવ્યો હતો.

બેઠક દરમિયાન ઈવીએમ (EVM) વ્યવસ્થાપન, મતદાન મથકો પર પાયાની સુવિધાઓ, પરિવહન અને કાયદો-વ્યવસ્થા જાળવવા જેવા મુદ્દાઓ પર ઝીણવટભરી ચર્ચા કરવામાં આવી હતી. કલેક્ટરે મેનપાવર મેનેજમેન્ટ અને ખર્ચ મોનિટરિંગ સેલને સક્રિય રહેવા સૂચના આપી છે.

આ ઉપરાંત, ચૂંટણી પ્રક્રિયામાં પારદર્શિતા લાવવા માટે વેબકાસ્ટિંગ, વીડિયોગ્રાફી અને સાયબર સિક્યુરિટી જેવી આધુનિક તકનીકોનો ઉપયોગ કરવામાં આવશે. SVEEP અંતર્ગત મતદાતા જાગૃતિ અભિયાન અને દિવ્યાંગ મતદારો માટેની ખાસ વ્યવસ્થાઓ અંગે પણ નોડલ અધિકારીઓને જરૂરી માર્ગદર્શન પૂરું પાડવામાં આવ્યું હતું. ચૂંટણીલક્ષી તમામ તૈયારીઓ સમયબદ્ધ રીતે પૂર્ણ કરવા વહીવટી તંત્ર હાલ ખડેપગે કામ કરી રહ્યું છે.