સુરેન્દ્રનગરમાં વિદ્યાર્થીઓની અટકેલી શિષ્યવૃત્તિ મુદ્દે ABVPનું કલેક્ટરને આવેદનપત્ર: ઉગ્ર રજૂઆત

ABVP Scholarship Protest | સુરેન્દ્રનગર જિલ્લા કલેક્ટર કચેરી ખાતે અખિલ ભારતીય વિદ્યાર્થી પરિષદ (ABVP) દ્વારા શિષ્યવૃત્તિની બાકી રકમ તાત્કાલિક ચૂકવવાની માંગ સાથે ઉગ્ર રજૂઆત કરવામાં આવી હતી.

ગુજરાતની શાળા-કોલેજોમાં અભ્યાસ કરતા SC, ST, SEBC અને EWS વર્ગના હજારો વિદ્યાર્થીઓએ શિષ્યવૃત્તિ માટે ઓનલાઈન અરજીઓ કરી હોવા છતાં, લાંબા સમયથી તેમના બેંક ખાતામાં રકમ જમા થઈ નથી.

શિક્ષણ વિભાગની MYSY, CMSS યોજનાઓ સહિત આદિજાતિ અને સમાજ કલ્યાણ વિભાગની પ્રી-મેટ્રિક અને પોસ્ટ-મેટ્રિક શિષ્યવૃત્તિની ચુકવણી અટકી પડી છે. ઘણી અરજીઓ વેરિફિકેશન, સેંક્શન કે પેમેન્ટ સ્ટેટસ લેવલે અટકેલી છે.

આ ઉપરાંત બેંક એકાઉન્ટ સાથે સંકળાયેલી ટેકનિકલ ખામીઓ, વહીવટી વિલંબ અને ઇન્સ્ટિટ્યૂટ વેરિફિકેશનના કારણે વિદ્યાર્થીઓ ભારે મુશ્કેલી ભોગવી રહ્યા છે.

આર્થિક રીતે નબળા પરિવારના વિદ્યાર્થીઓને શિષ્યવૃત્તિ ન મળતાં શાળા-કોલેજ ફી, હોસ્ટેલ ફી, પુસ્તકો અને રહેવા-જમવાના ખર્ચનું ભારે આર્થિક ભારણ વાલીઓ પર વધી રહ્યું છે.

ABVP ના પ્રદેશ નેતાઓ અને કાર્યકરોએ કલેક્ટરને આવેદનપત્ર પાઠવી તમામ બાકી શિષ્યવૃત્તિની રકમ સીધી DBT મારફતે ખાતામાં જમા કરવા અને પેન્ડિંગ અરજીઓનો સમયબદ્ધ નિકાલ લાવવા મજબૂત માંગ કરી છે.