સાયલાના સુદામડામાં ખનીજ ચોરી પર પોલીસની સર્જિકલ સ્ટ્રાઈક: 5 ખાણો ઝડપાઈ, કરોડોનો મુદ્દામાલ જપ્ત

સાયલા તાલુકાના સુદામડા સીમ વિસ્તારમાં ચાલતા ગેરકાયદેસર ખનન પર લીંબડી ડીવાયએસપી, એલસીબી અને એસઓજીની ટીમે સંયુક્ત ઓપરેશન હાથ ધરીને ખનીજ ચોરીનું મસમોટું કૌભાંડ ઝડપી પાડ્યું છે.

પોલીસે પાંચ જેટલી ગેરકાયદે પથ્થરની ખાણો પર દરોડા પાડીને ઘટનાસ્થળેથી 13 જેસીબી મશીન અને 35 ડમ્પર કબજે કર્યા છે. આ કાર્યવાહી દરમિયાન વિસ્ફોટકો ભરેલા 15 જેટલા ડાર (બ્લાસ્ટિંગ હોલ) પણ મળી આવતા ખળભળાટ મચી ગયો છે.

ઘટનાની ગંભીરતા જોતા જિલ્લા પોલીસ વડા (SP) પણ સ્થળ પર દોડી આવ્યા હતા. ખાણ ખનીજ વિભાગ દ્વારા હવે આ વિસ્તારની માપણી હાથ ધરવામાં આવશે અને ડમ્પર ચાલકોના નિવેદનો લેવાની પ્રક્રિયા શરૂ કરાઈ છે.

ઉલ્લેખનીય છે કે, અગાઉ આ વિસ્તારમાં 2.67 અબજથી વધુનો દંડ ફટકારાયા હોવા છતાં ફરીથી મોટા પાયે ખનીજ ચોરી શરૂ થતા સ્થાનિક તંત્ર અને મામલતદાર કચેરીની કામગીરી સામે ગંભીર સવાલો ઉભા થયા છે. હાલ તમામ મુદ્દામાલ જપ્ત કરી કાયદેસરની કાર્યવાહી હાથ ધરવામાં આવી છે.