પાટડી નાગરિક સહકારી બેંક ફરી વિવાદમાં: ATM અને સ્કેનિંગ મશીન ખરીદીની વિગતો છુપાવતા ભ્રષ્ટાચારની આશંકા

સુરેન્દ્રનગર જિલ્લાની પાટડી નાગરિક સહકારી બેંક પોતાની કામગીરીને લઈને ફરી એકવાર વિવાદના વમળમાં ફસાઈ છે. બેંકના સભાસદ વિક્રમભાઈ રબારી દ્વારા બેંક દ્વારા ખરીદવામાં આવેલા એટીએમ (ATM) અને સ્કેનિંગ મશીનોના ખર્ચ અને ખરીદી પ્રક્રિયા અંગે સવાલો ઉઠાવી જિલ્લા રજિસ્ટ્રાર સમક્ષ તપાસની માંગ કરવામાં આવી છે.

આ મશીનો કયા આધારે ખરીદાયા અને તેમાં બેંકના કેટલા નાણાંનો વપરાશ થયો તે અંગેની પારદર્શક વિગતો માંગવામાં આવી હતી. આ મામલે જિલ્લા રજિસ્ટ્રાર અને સહકારી મંડળી દ્વારા પાટડી નાગરિક બેંકને લેખિતમાં જાણ કરી વિગતો રજૂ કરવા સૂચના આપવામાં આવી હતી.

જોકે, નિર્ધારિત સમયમર્યાદા પૂર્ણ થઈ હોવા છતાં બેંક તંત્ર દ્વારા સરકારી કચેરીને કોઈ પણ પ્રકારનો પ્રત્યુત્તર આપવામાં આવ્યો નથી. વહીવટી તંત્રને પણ વિગતો ન આપતા હવે આ ખરીદીમાં મોટા પાયે ગોલમાલ અને ભ્રષ્ટાચાર થયો હોવાની શંકા દ્રઢ બની છે. આગામી દિવસોમાં આ મામલે રજિસ્ટ્રાર કચેરી દ્વારા કડક કાયદાકીય કાર્યવાહી કરવામાં આવે તેવા એંધાણ વર્તાઈ રહ્યા છે.