સિદ્ધિ:પાણશીણા પ્રાથમિક આરોગ્ય કેન્દ્રને રાષ્ટ્રીયકક્ષાનું NQAS સર્ટિફિકેટ મળ્યું

સુરેન્દ્રનગર જિલ્લાના લીંબડી તાલુકાના પાણશીણા ગામે આવેલા પ્રાથમિક આરોગ્ય કેન્દ્ર (PHC) એ રાષ્ટ્રીય સ્તરે મોટી સિદ્ધિ હાંસલ કરી છે. પાણશીણા PHC ને ભારત સરકાર દ્વારા આપવામાં આવતું પ્રતિષ્ઠિત NQAS (National Quality Assurance Standards) સર્ટિફિકેટ પ્રાપ્ત થયું છે. લીંબડી તાલુકામાં શિયાણી PHC બાદ આ સન્માન મેળવનાર પાણશીણા તાલુકાનું બીજું આરોગ્ય કેન્દ્ર બન્યું છે.

ગત 20 અને 21 જાન્યુઆરી 2026 ના રોજ રાજ્ય બહારના નિષ્ણાતોની ટીમ દ્વારા આ કેન્દ્રનું ઝીણવટપૂર્વક નિરીક્ષણ કરવામાં આવ્યું હતું. જેમાં હોસ્પિટલનો આંતરિક અને બાહ્ય દેખાવ, સ્ટાફની હાજરી, OPD-IPD સુવિધાઓ, રાષ્ટ્રીય આરોગ્ય કાર્યક્રમોનું અમલીકરણ અને સ્ટાફના કૌશલ્ય જેવા વિવિધ પાસાઓની ચકાસણી કરવામાં આવી હતી. 5 ફેબ્રુઆરીએ જાહેર થયેલા પરિણામમાં પાણશીણા PHC એ 93 ટકા ગુણ મેળવીને તમામ માપદંડો સફળતાપૂર્વક પૂર્ણ કર્યા છે. મેડિકલ ઓફિસર ડો. કાજલ નાંઘા અને ડો. અંકિતા ડોડિયા સહિતના સમગ્ર સ્ટાફે આ સિદ્ધિ મેળવવા ભારે જહેમત ઉઠાવી હતી.