લીંબડી: પાણશીણા ચેક પોસ્ટ પરથી ટ્રકના ચોરખાનામાં છુપાવેલો 1.21 લાખનો દારૂ ઝડપાયો

લીંબડી-અમદાવાદ હાઈવે પર આવેલી પાણશીણા ચેક પોસ્ટ પર પોલીસે બાતમીના આધારે મોટી કાર્યવાહી કરીને વિદેશી દારૂ અને બીયરનો જથ્થો ઝડપી પાડ્યો છે. પાણશીણા પોલીસ સ્ટેશનના સ્ટાફને ખાનગી રાહે બાતમી મળી હતી કે, અમદાવાદ તરફથી આવતી એક ટ્રકમાં પ્લાસ્ટિકના દાણાના કોથળાની આડમાં દારૂની હેરાફેરી થઈ રહી છે.

બાતમીના આધારે વોચ ગોઠવી પોલીસે ટ્રકને રોકી તપાસ કરતા ડ્રાઈવર સીટની પાછળના ગુપ્ત ખાનામાંથી દારૂની બોટલો અને બીયરના ટીન મળી આવ્યા હતા.

પોલીસે આ મામલે ચોટીલાના રહેવાસી સુલતાન ઉમરભાઈ કલાડીયા નામના શખ્સની ધરપકડ કરી છે. તપાસ દરમિયાન 1,21,960 રૂપિયાની કિંમતનો દારૂ અને બીયરનો જથ્થો, 12,00,000 રૂપિયાની ટ્રક તથા મોબાઈલ ફોન મળીને કુલ 13,26,960 રૂપિયાનો મુદ્દામાલ કબજે કરવામાં આવ્યો છે. પોલીસે દારૂ ભરી આપનાર અને મંગાવનાર સહિતના અન્ય શખ્સો વિરુદ્ધ ગુનો નોંધી વધુ તપાસ હાથ ધરી છે.