લખતરમાં રેન્જ આઈ.જી.ની ટીમનો દરોડો: રહેણાંક મકાનમાંથી 30 લાખનો દારૂ ઝડપાયો

સુરેન્દ્રનગર જિલ્લામાં દારૂ અને જુગાર જેવી અસામાજિક પ્રવૃત્તિઓ પર લગામ કસવા માટે પોલીસ એક્શન મોડમાં આવી છે. રાજકોટ રેન્જ આઈ.જી. (Range IG) નિર્લિપ્ત રાયની ટીમે લખતર શહેરી વિસ્તારમાં એક મોટી કાર્યવાહી હાથ ધરી છે.

બાતમીના આધારે લખતરની સુથાર શેરીમાં આવેલા એક રહેણાંક મકાનમાં દરોડો પાડવામાં આવ્યો હતો. આ ઓપરેશન દરમિયાન ઈમરાન ઉર્ફે મશાલ હબીબશા અને શાહરૂખશા હબીબશા દ્વારા છુપાવવામાં આવેલો વિદેશી દારૂનો મોટો જથ્થો મળી આવ્યો હતો.

આ દરોડામાં અલગ-અલગ બ્રાન્ડની કુલ 7163 દારૂની બોટલો અને 1080 બીયરના ટીન જપ્ત કરવામાં આવ્યા છે. પકડાયેલા મુદ્દામાલમાં રૂ.29,75,292 ની કિંમતનો દારૂ તથા રૂ.70,000 નું બાઇક મળીને કુલ રૂ.30,45,892 નો મુદ્દામાલ પોલીસ દ્વારા કબજે લેવામાં આવ્યો છે.

આ કેસમાં મદદગારી કરનાર મોઈન મુસ્તુફા અને હિરાભાઈ ભરવાડ સહિતના શખ્સો સામે પ્રોહીબિશન એક્ટ હેઠળ ગુનો દાખલ કરવામાં આવ્યો છે. મહત્વની વાત એ છે કે સ્થાનિક પોલીસને અંધારામાં રાખીને કરવામાં આવેલી આ રેડને કારણે સ્થાનિક તંત્રની કામગીરી સામે અનેક સવાલો ઉભા થયા છે.