- કોન્ટ્રાક્ટર નીલકંઠ પટેલ દ્વારા મોટો ભ્રષ્ટાચાર કરાતો હોવાનો વીડિયો વાયરલ
- પૂર્વ તાલુકા પંચાયત સદસ્ય પદ્માબેન મકવાણાએ TDOને કરી લેખિત રજૂઆત
- તાલુકા વિકાસ અધિકારી પીયૂષ રાવતે તાત્કાલિક કામ બંધ કરાવી એન્જિનિયરને કાયદેસરની કાર્યવાહી કરવા આદેશ આપ્યો
Lakhtar Road Corruption | લખતર તાલુકાના શહેરી તેમજ ગ્રામ્ય વિસ્તારોમાં રોડ-રસ્તા, ગટર લાઇન અને અન્ય વિકાસના કામોમાં ગેરરીતિ તેમજ ભ્રષ્ટાચારના કિસ્સાઓ વારંવાર સામે આવી રહ્યા છે. ત્યારે વધુ એક વખત લખતર શહેરની લખતરિયા શેરીમાં ચાલી રહેલા સી.સી. રોડના કામમાં કોન્ટ્રાક્ટર દ્વારા મોટા પાયે ભ્રષ્ટાચાર આચરવામાં આવતો હોવાનો મામલો ગરમાયો છે.
નિયમોના લીરેલીરા ઉડાડતો વીડિયો વાયરલ મળતી માહિતી મુજબ, લખતરિયા શેરીમાં ચાલી રહેલા આ સીસી રોડના કામમાં કોન્ટ્રાક્ટરે તમામ નિયમો નેવે મૂકી દીધા હતા. નિયમ મુજબ બે સીએમ (CM) ફ્લોરિંગ ગોળામાં ૬ થેલી સિમેન્ટનો માલ બનાવવાનો હોય છે, તેના બદલે કોન્ટ્રાક્ટર દ્વારા માત્ર ૧ જ થેલી સિમેન્ટ, ૪૦ એમએમની ગુણવત્તાયુક્ત કપચીના બદલે રેફા વાળી ૭ બકેટ કપચી અને ૩ બકેટ રેતી નાખીને મસ્ત મોટો ભ્રષ્ટાચાર આચરવામાં આવતો હતો.
એક જાગૃત નાગરિકે મટીરીયલ મિક્સ થઈ રહ્યું હતું તે જગ્યાએ પહોંચી વીડિયોગ્રાફી કરતા આ સમગ્ર ભ્રષ્ટાચાર કેમેરામાં કેદ થયો હતો અને તેનો વીડિયો સોશિયલ મીડિયામાં વાયરલ થયો હતો. આ સિવાય રોડની તપાસ કરતા માલૂમ પડ્યું હતું કે PCC કામમાં ૪ ઇંચની જગ્યાએ માત્ર ૨ ઇંચ જેટલી જ થીકનેસ (જાડાઈ) આપીને લોલમલોલ કામગીરી કરાઈ રહી હતી.
પોતાની ગ્રાન્ટના રોડમાં ભ્રષ્ટાચાર જોઈ પૂર્વ સદસ્ય લાલઘૂમ
આ રોડ લખતર તાલુકા પંચાયતના પૂર્વ સદસ્ય પદ્માબેન મકવાણાએ પોતાના કાર્યકાળ દરમિયાન સ્થાનિક લોકોની સુવિધા માટે પોતાની ગ્રાન્ટમાંથી મંજૂર કરાવ્યો હતો. જ્યારે તેઓને આ નબળી કામગીરીની ખબર પડી ત્યારે તેઓ રૂબરૂ દોડી આવ્યા હતા. પદ્માબેન દ્વારા મટીરીયલ બાબતે પૂછપરછ અને વીડિયો રેકોર્ડિંગ કરવામાં આવતા કોન્ટ્રાક્ટર નીલકંઠ પટેલ ઉશ્કેરાઈ ગયો હતો. ભ્રષ્ટાચાર છતો થવા છતાં કોન્ટ્રાક્ટરે પૂર્વ સદસ્યને ધમકી આપતા બેફામ બોલ્યો હતો કે, “તમારાથી થાય તે કરી લો, હું તો એક જ સિમેન્ટની થેલી નાખીશ.”
TDO દ્વારા કામ બંધ કરાવવા આદેશ
કોન્ટ્રાક્ટરની દાદાગીરી અને નબળા કામને પગલે પદ્માબેન મકવાણાએ તાત્કાલિક ધોરણે તાલુકા વિકાસ અધિકારી (TDO) પીયૂષ રાવત અને તાલુકા બાંધકામ એન્જિનિયરને લેખિત અરજી કરી કડક પગલાં ભરવા માંગ કરી હતી. સમગ્ર મામલાની ગંભીરતા જોઈ TDO પીયૂષ રાવત તાત્કાલિક એક્શનમાં આવ્યા હતા અને ટેલિફોનિક જાણ કરીને કામ તાત્કાલિક ધોરણે બંધ કરાવી દીધું હતું. સાથે જ બાંધકામ વિભાગના એન્જિનિયરને સ્થળ તપાસ કરી કોન્ટ્રાક્ટર સામે કાયદેસરની કાર્યવાહી કરવા માટે કડક સૂચના આપી છે.