ધ્રાંગધ્રાની ચુલી ચેકપોસ્ટ પાસે કારમાંથી રૂ.1.22 લાખનો દારૂ ઝડપાયો

સુરેન્દ્રનગર જિલ્લાના ધ્રાંગધ્રા તાલુકા પોલીસ મથકની ટીમે દારૂબંધીના કડક અમલ માટે હાથ ધરેલા પેટ્રોલિંગ દરમિયાન મોટી સફળતા મેળવી છે. પોલીસ સ્ટાફ જ્યારે ચુલી ચેકપોસ્ટ નજીક કાર્યરત હતો, ત્યારે એક શંકાસ્પદ કાર પસાર થતા તેને અટકાવીને તલાશી લેવામાં આવી હતી.

તપાસ દરમિયાન કારમાંથી જુદી જુદી બ્રાન્ડની ઇંગ્લિશ દારૂની 94 નંગ બોટલો મળી આવી હતી, જેની અંદાજિત કિંમત 1,22,200 રૂપિયા આંકવામાં આવી છે.

પોલીસે ઘટનાસ્થળેથી દારૂના જથ્થા સાથે કાર ચાલક નરેન્દ્રભાઈ મૂળજીભાઈ રાઠોડની ધરપકડ કરી છે. આ કાર્યવાહીમાં 3,00,000 રૂપિયાની કાર અને દારૂ સહિત કુલ 4,22,200 રૂપિયાનો મુદ્દામાલ કબજે કરવામાં આવ્યો છે.

જોકે, આ ગુનામાં સંડોવાયેલ અન્ય એક શખ્સ જયેશભાઈ મૂળજીભાઈ રાઠોડ પોલીસને હાજર મળી આવ્યો ન હતો. ધ્રાંગધ્રા પોલીસે બંને શખ્સો વિરુદ્ધ પ્રોહિબિશન એક્ટ હેઠળ ગુનો નોંધી ફરાર આરોપીને ઝડપી પાડવા માટેના ચક્રો ગતિમાન કર્યા છે. હાઈવે પર નશીલા પદાર્થોની હેરાફેરી અટકાવવા માટે પોલીસની આ કામગીરીને પગલે બુટલેગરોમાં ફફડાટ વ્યાપી ગયો છે.