સુરેન્દ્રનગર | ધ્રાંગધ્રા તાલુકામાં 108 (Emergency Service)ની ટીમે સમયસૂચક કામગીરી કરીને રસ્તામાં જ સફળ (Delivery) કરાવી માતા અને નવજાત શિશુનો જીવ બચાવ્યો છે. સોલડી ગામની ગર્ભવતી મહિલા લીલાબેનને અચાનક પ્રસૂતિ પીડા ઉપડતા તેમને સુરેન્દ્રનગર સારવાર માટે ખસેડવામાં આવી રહ્યા હતા.
ખાંભડા ગામ નજીક પહોંચતા મહિલાની સ્થિતિ ગંભીર બનતા 108 એમ્બ્યુલન્સના પાયલોટ હરપાલસિંહે વાહનને સુરક્ષિત રીતે રોડ સાઇડ પર ઊભું રાખ્યું. ત્યારબાદ ઇએમટી (EMT) સુરેશભાઈ ચૌધરીએ જરૂરી તબીબી વ્યવસ્થા ગોઠવી એમ્બ્યુલન્સમાં જ પ્રસૂતિ પ્રક્રિયા હાથ ધરી હતી. ટીમની સૂઝબૂઝ અને તાલીમના કારણે સફળ ડિલિવરી કરાવવામાં આવી હતી.
આ કટોકટીની પળે 108 ટીમે બજાવેલી ફરજને પરિવારજનો તથા સ્થાનિકોએ બિરદાવી છે. જિલ્લામાં 108 ઇમરજન્સી સેવા ફરી એકવાર સગર્ભા મહિલાઓ માટે આશીર્વાદરૂપ સાબિત થઈ છે.
