ધ્રાંગધ્રા (Dhrangadhra) શહેરની ચરમાળિયા સોસાયટીમાં (Charmaliya Society) એક ચોંકાવનારી ઘટના સામે આવી છે. અહીં એક બાળકના બૂટમાંથી સાપ (Snake) નીકળતા પરિવારમાં ફફડાટ વ્યાપી ગયો હતો. સદનસીબે, બાળકે બૂટ પહેરતા પહેલા સાપને જોઈ લેતા મોટી જાનહાનિ ટળી હતી.
બાળક જ્યારે પોતાના બૂટ પહેરવા જઈ રહ્યો હતો, ત્યારે તેની નજર અંદર છુપાયેલા સાપ પર પડી હતી. તેણે તુરંત જ પરિવારને જાણ કરી હતી. પરિવારે તાત્કાલિક સાપ પકડવાના નિષ્ણાત જયેશભાઈ ઝાલાનો સંપર્ક કર્યો હતો. જયેશભાઈએ સ્થળ પર પહોંચી સાપનું સુરક્ષિત રીતે રેસ્ક્યૂ (Rescue) કર્યું હતું અને ત્યારબાદ તેને વન વિભાગને સોંપવામાં આવ્યો હતો.
ઉનાળાની શરૂઆત થતા જ તાપમાનમાં વધારો થયો છે, જેના કારણે સાપ જેવા સરિસૃપ જીવો ઠંડકની શોધમાં માનવ વસાહતો તરફ વળી રહ્યા છે. આ ઘટના બાદ વન વિભાગના (Range Forest Officer) કુલદીપભાઈ ચૌહાણે લોકોને વિશેષ કાળજી રાખવા સૂચના આપી છે.
વન વિભાગની અપીલ આર.એફ.ઓ. ચૌહાણે જણાવ્યું હતું કે, ગરમીથી બચવા માટે સાપ અવારનવાર ઘરના ખૂણા, બૂટ-ચંપલ કે બગીચા જેવી ઠંડી જગ્યાએ છુપાઈ જતા હોય છે. તેમણે લોકોને નીચે મુજબની તકેદારી રાખવા જણાવ્યું છે:
– ઘરની બહાર રાખવામાં આવેલા બૂટ કે ચંપલ પહેરતા પહેલા તેને બરાબર તપાસી લેવા. – રોજિંદા વપરાશની વસ્તુઓ ખુલ્લામાં રાખવાનું ટાળવું. – સાપ દેખાય તો ગભરાવાને બદલે તાત્કાલિક નિષ્ણાત અથવા વન વિભાગનો સંપર્ક કરવો. – ઉનાળાના (Summer) દિવસોમાં ઘરની આસપાસની જગ્યાઓ સાફ રાખવી અને અંધારામાં ટોર્ચ વગર બહાર ન નીકળવું જોઈએ જેથી આવા અકસ્માતોથી બચી શકાય.
