Dasada-Patdi News | સુરેન્દ્રનગર જિલ્લાના દસાડા તાલુકાના ઝેઝરી ગામની સીમમાં બજાણા પોલીસે (Bajana Police) મોટી કાર્યવાહી કરી છે. ખેતરમાં છુપાવેલો ભારતીય બનાવટનો વિદેશી દારૂ અને બિયરનો મોટો જથ્થો પોલીસે ઝડપી પાડ્યો છે. જોકે, પોલીસ દરોડા (Raid) દરમિયાન બંને બુટલેગરો ફરાર થઈ જવામાં સફળ રહ્યા હતા.
બજાણા પોલીસ સ્ટેશનના ઇન્ચાર્જ PI એ.કે. વાઘેલા અને તેમની ટીમને પેટ્રોલિંગ (Patrolling) દરમિયાન સચોટ બાતમી મળી હતી કે, ઝેઝરીથી અંકેવાડિયા જવાના માર્ગ પર આવેલા મયુરખાન મલેકના ખેતરમાં દારૂનો જથ્થો છુપાવવામાં આવ્યો છે. પોલીસે ખેતરમાં તપાસ કરતા કડબની આડશ નીચે છુપાવેલી કુલ 1344 નંગ નાની-મોટી દારૂની બોટલો અને બિયરના ટીન (કિંમત: ₹8,63,184) મળી આવ્યા હતા.
આ ગેરકાયદેસર પ્રવૃત્તિમાં સંડોવાયેલા ઝેઝરી ગામના મયુરખાન મહમદખાન મલેક અને પીપળી ગામના બિસ્મીલ્લાખાન ઉર્ફે બિસુ દિલાવરખાન મલેક વિરુદ્ધ પ્રોહિબિશન એક્ટ (Prohibition Act) હેઠળ ગુનો દાખલ કરવામાં આવ્યો છે. દરોડા દરમિયાન બંને આરોપીઓ હાજર ન મળતા તેમને ફરાર જાહેર કરવામાં આવ્યા છે. પોલીસ હવે ફરાર આરોપીઓને ઝડપી પાડવા ચક્રો ગતિમાન કર્યા છે.
