વઢવાણના સંત રોહિદાસ મંદિરે મેગા મેડિકલ કેમ્પ: 500થી વધુ દર્દીઓની આંખ અને એનિમિયાની તપાસ

Wadhwan Medical Camp | સુરેન્દ્રનગર જિલ્લામાં રોટરી ક્લબ (Rotary club) અને શ્રીમદ્ રાજચંદ્ર હોસ્પિટલ દ્વારા ગ્રામીણ અને શહેરી વિસ્તારોમાં આરોગ્યલક્ષી સેવાઓ પહોંચાડવા માટે સતત પ્રયાસો કરવામાં આવી રહ્યા છે.

સંસ્થાઓ દ્વારા અત્યાર સુધીમાં જિલ્લાના 50થી વધુ ગામોમાં વિવિધ કેમ્પ યોજીને લોહીની ઉણપ (એનિમિયા) અને આંખની તકલીફ વાળા હજારો દર્દીઓને નવું જીવન આપવાનું ભગીરથ કાર્ય કરાયું છે.

આ જ શ્રૃંખલા અંતર્ગત વઢવાણના નવા દરવાજા વિસ્તારમાં આવેલા ઐતિહાસિક સંત રોહીદાસ મંદિરના પટાંગણમાં એક વિશાળ મફત મેડિકલ કેમ્પનું આયોજન કરવામાં આવ્યું હતું. આ કેમ્પમાં વઢવાણ અને આજુબાજુના વિસ્તારના 500 થી વધુ દર્દીઓએ લાભ લીધો હતો.

રોટરી ક્લબના પ્રમુખ હિરેનભાઈ શાહ, સેક્રેટરી હિતેશભાઈ દફ્તરી, તેમજ સ્થાનિક અગ્રણીઓ મોહનભાઈ પટેલ, તૃપ્તિબેન આચાર્ય અને નટુભાઈ પરમાર સહિતના આગેવાનોની પ્રેરક ઉપસ્થિતિમાં યોજાયેલા આ કેમ્પમાં આંખની તપાસના વિભાગમાં 200 થી વધુ દર્દીઓના નંબર ચેક કરી તેમને વિનામૂલ્યે ચશ્માનું વિતરણ કરવામાં આવ્યું હતું.

આ ઉપરાંત મોતીબિંદુ (મોતિયા) ધરાવતા વૃદ્ધોની યાદી તૈયાર કરવામાં આવી હતી, જેમના ઓપરેશન આગામી દિવસોમાં મફત કરી આપવામાં આવશે. શ્રીમદ રાજચંદ્ર હોસ્પિટલના તબીબો દ્વારા ખાસ કરીને મહિલાઓમાં જોવા મળતા એનિમિયા (પાંડુરોગ) ની તપાસ કરી જરૂરી દવાઓ આપવામાં આવી હતી.

આ ઉમદા કાર્યમાં સ્થાનિક 50 થી વધુ યુવાનોએ ઉત્સાહભેર રક્તદાન પણ કર્યું હતું જેથી કટોકટીના સમયે કોઈ દર્દીનો કીમતી જીવ બચાવી શકાય.