દેદાદરા નજીક જુગારધામ પર રોડા: અધૂરો મુદ્દામાલ દર્શાવતા વઢવાણ પોલીસની કામગીરી શંકાના ઘેરામાં

Gambling Raid : સુરેન્દ્રનગર જિલ્લાના વઢવાણ તાલુકાના દેદાદરા ગામ નજીક ચાલી રહેલા જુગારધામ પર વઢવાણ પોલીસે દરોડા (Gambling Raid) પાડીને કુલ 8 જુગારીઓની અટકાયત કરી છે. પોલીસ ચોપડે દર્શાવ્યા અનુસાર, દરોડા દરમિયાન 1 રિક્ષા અને ₹20,000 ની રોકડ સહિત કુલ ₹1.20 લાખનો મુદ્દામાલ જપ્ત કરીને કાયદેસરની કાર્યવાહી હાથ ધરવામાં આવી છે.

આ રેડ દરમિયાન દેવાભાઈ જાદવ, વનરાજસિંહ ડોડીયા, સુખદેવ ચૌહાણ, રમેશ રાઠોડ, રાકેશ દેગામડીયા, દીપક દેગામડીયા, વિશાલ કુંતીયા અને નરેશ નંદાની ધરપકડ કરવામાં આવી છે. જોકે, આ આખી કાર્યવાહીમાં પોલીસે અધૂરો મુદ્દામાલ દેખાડ્યો હોવાની ચર્ચાએ જોર પકડ્યું છે.

સામાન્ય રીતે જુગારના દરોડા દરમિયાન આરોપીઓ પાસેથી મોબાઈલ ફોન જપ્ત કરવાનો નિયમ હોવા છતાં, વઢવાણ પોલીસે એકપણ આરોપીનો મોબાઈલ જપ્ત કર્યો ન હતો.

નવાઈની વાત એ છે કે, ધરપકડ બાદ પોલીસ દ્વારા પાડવામાં આવેલા આરોપીઓના ફોટો સેશન દરમિયાન પણ જુગારીઓના શર્ટના ખિસ્સામાં મોબાઈલ ફોન સ્પષ્ટપણે નજરે પડતા હતા.

પોલીસને આ મોબાઈલ કેમ ન દેખાયા અને તે જપ્ત કેમ ન કરાયા, તેની સામે અનેક સવાલો ઊભા થયા છે. વઢવાણ પોલીસની આ શંકાસ્પદ બેદરકારીને પગલે, જો ઉચ્ચ પોલીસ અધિકારીઓ આ મામલે તટસ્થ તપાસ કરે તો મોટા ખુલાસા થાય તેવી ચર્ચા હાલ પંથકમાં જોરશોરથી ચાલી રહી છે.