સુરેન્દ્રનગર: પિતાએ મોબાઈલ જોવાની ના પાડતા 14 વર્ષનો પુત્ર ઘર છોડીને ભાગ્યો, વઢવાણ પોલીસે 6 કલાકમાં શોધી કાઢ્યો

Surendranagar Child Missing : આજના ડિજિટલ યુગમાં બાળકોમાં મોબાઈલની લત ચિંતાજનક હદે વધી રહી છે, જેનો લાલબત્તી સમાન કિસ્સો સુરેન્દ્રનગર-વઢવાણના ગણપતિ ફાટસર વિસ્તારમાં સામે આવ્યો છે.

અહીં ધોરણ 9 માં અભ્યાસ કરતા 14 વર્ષીય પ્રિન્સ રાઠોડ નામના બાળકને તેના પિતાએ મોબાઈલ મૂકીને અભ્યાસમાં ધ્યાન આપવા બાબતે થોડો ઠપકો આપ્યો હતો. આ સામાન્ય વાત બાળકને મન પર લાગી આવતા તે ગુસ્સામાં અને રિસાઈને ઘર છોડીને ક્યાંક ચાલ્યો ગયો હતો.

બાળક મોડે સુધી ઘરે પરત ન ફરતા ચિંતિત બનેલા માતા-પિતા અને સગા-સંબંધીઓએ તાત્કાલિક વઢવાણ પોલીસ મથકે આ અંગે જાણ કરી હતી.

ઘટનાની ગંભીરતાને જોઈને વઢવાણ પોલીસે તાત્કાલિક શોધખોળ હાથ ધરી હતી. પોલીસે ‘નેત્રમ પ્રોજેક્ટ’ હેઠળ શહેરમાં લાગેલા સીસીટીવી (CCTV) કેમેરા ચેક કરતા આ બાળક નજીકની જ એક દુકાનમાં બેઠેલો જોવા મળ્યો હતો.

પોલીસે તેને પ્રેમથી સમજાવીને પોલીસ સ્ટેશન લાવી, DySP સહિતના ઉચ્ચ અધિકારીઓની હાજરીમાં તેના માતા-પિતા સાથે મિલન કરાવ્યું હતું. માત્ર 6 કલાકની ટૂંકી જહેમત બાદ પુત્ર હેમખેમ મળી આવતા પરિવારે રાહતનો શ્વાસ લીધો હતો અને પોલીસનો આભાર માન્યો હતો.

પોલીસ અધિકારીઓએ બાળક અને પિતા બંનેને પ્રેમથી કાઉન્સિલિંગ કરી આગામી સમયમાં આવી ભૂલ ન કરવા તાકીદ કરી હતી.