જોરાવરનગરમાં પોલીસની સ્પેશિયલ ડ્રાઇવ, ટ્રાફિક નિયમોનો ભંગ કરતા 117 વાહન ચાલકો દંડાયા

સુરેન્દ્રનગર જિલ્લામાં ટ્રાફિક વ્યવસ્થા સુધારવા અને ગુનાખોરી પર અંકુશ મેળવવા માટે પોલીસ દ્વારા એક મોટી કાર્યવાહી હાથ ધરવામાં આવી છે. સુરેન્દ્રનગર જિલ્લા પોલીસ અધિક્ષક (SP) પ્રેમસુખ ડેલુ અને ડિવિઝનના ASP વૈદિકા બિહાનીના માર્ગદર્શન હેઠળ જોરાવરનગર પોલીસ સ્ટેશનના ASP કરણકુમાર પન્ના અને તેમની ટીમ દ્વારા શહેરમાં 3 દિવસીય સ્પેશિયલ ટ્રાફિક ડ્રાઇવનું આયોજન કરવામાં આવ્યું હતું.

આ ખાસ ઝુંબેશ દરમિયાન નિયમોનું ઉલ્લંઘન કરનારા વાહન ચાલકો સામે કડક કાયદાકીય પગલાં લેવામાં આવ્યા છે. આ 3 દિવસની કડક ચેકિંગ ઝુંબેશ દરમિયાન કુલ 117 વાહનચાલકો ટ્રાફિક નિયમોનો ભંગ કરતા ઝડપાયા હતા. જેમની પાસેથી પોલીસે કુલ 35,700 રૂપિયાનો દંડ વસૂલ કર્યો છે.

આ ઉપરાંત, શંકાસ્પદ અને નિયમભંગ કરનારા 11 વાહનોને કાયદેસરની કાર્યવાહી હેઠળ ડિટેઇન કરવામાં આવ્યા છે. પોલીસની આ આકસ્મિક કાર્યવાહીથી નિયમોનું ઉલ્લંઘન કરનારા વાહન ચાલકોમાં ભારે ફફડાટ વ્યાપી ગયો છે.