સુરેન્દ્રનગર જિલ્લા પુરવઠા વિભાગનું ગેસ ગોડાઉનો અને હોટલોમાં ચેકિંગ

સુરેન્દ્રનગર જિલ્લા વહીવટી તંત્રના પુરવઠા વિભાગ દ્વારા ગેસ સિલિન્ડરના ગેરકાયદેસર વપરાશ અને સંગ્રહખોરી અટકાવવા માટે જિલ્લાવ્યાપી કડક ઝુંબેશ શરૂ કરવામાં આવી છે. પુરવઠા અધિકારીઓની અલગ-અલગ ટીમોએ સ્થાનિક હોટલો, રેસ્ટોરન્ટ અને જાણીતા ખાણી-પીણીના એકમો પર આકસ્મિક દરોડા પાડી તપાસ હાથ ધરી હતી. આ કાર્યવાહીનો મુખ્ય ઉદ્દેશ્ય ઘરેલું ગેસનો વ્યાપારી ઉપયોગ રોકવાનો છે.

તપાસ દરમિયાન હોટલ સંચાલકો દ્વારા નિયમ મુજબના કોમર્શિયલ સિલિન્ડરનો ઉપયોગ થાય છે કે નહીં અને વધુ પડતો જથ્થો સંગ્રહિત કરાયો છે કે કેમ તેની ઝીણવટભરી ચકાસણી કરવામાં આવી હતી. આ ઉપરાંત, જિલ્લાના વિવિધ LPG ગેસ ગોડાઉનો પર પણ ટીમોએ દરોડા પાડ્યા હતા. ત્યાં ઉપલબ્ધ સ્ટોક અને રજિસ્ટરની એન્ટ્રીઓની સરખામણી કરવામાં આવી હતી. પુરવઠા વિભાગે સ્પષ્ટ ચેતવણી આપી છે કે જો સ્ટોકમાં કોઈ પણ પ્રકારની વિસંગતતા કે સંગ્રહખોરી જણાશે તો જવાબદારો સામે કડક કાયદેસરની કાર્યવાહી કરવામાં આવશે.