સુરેન્દ્રનગરમાં રખડતા શ્વાનના ડિજિટલ બાયોડેટા બનાવી ખસીકરણ કરાશે

સુરેન્દ્રનગર (Surendranagar) શહેરને વર્ષ 2030 સુધીમાં રેબીસ ફ્રી (Rabies Free) બનાવવા માટે મહાનગરપાલિકા દ્વારા એક વિશેષ અભિયાન શરૂ કરવામાં આવ્યું છે. અમદાવાદની એક્સપર્ટ એજન્સી ‘ગોલ ફાઉન્ડેશન’ (Goal Foundation) ના 12 સભ્યોની ટીમ દ્વારા શહેરમાં પ્રથમવાર રખડતા શ્વાનનો વૈજ્ઞાનિક પદ્ધતિથી સર્વે (Survey) કરવામાં આવશે.

આ સર્વેમાં સોફ્ટવેર (Software) અને મોબાઈલ એપ (Mobile App)ની મદદથી દરેક શ્વાનનો ફોટો, રંગ, કદ, જાતિ (નર-માદા) અને શારીરિક તંદુરસ્તી જેવી વિગતોનો બાયોડેટા (Biodata) તૈયાર કરવામાં આવશે. જીઓ-મેપિંગ (Geo-mapping) દ્વારા કયા વિસ્તારમાં કેટલા શ્વાન છે તેની ચોક્કસ માહિતી ઓનલાઈન (Online) ઉપલબ્ધ થશે.

શહેરમાં દર મહિને સરેરાશ 425 જેટલા ડોગબાઇટ (Dog bite)ના કેસ નોંધાય છે, જે ગંભીર ચિંતાનો વિષય છે. આ સર્વે પૂર્ણ થયા બાદ તમામ શ્વાનનું ખસીકરણ (Sterilization) કરવામાં આવશે. ખસીકરણ બાદ શ્વાનને 6 દિવસ સુધી ઓબ્ઝર્વેશન (Observation) હેઠળ રાખીને જે-તે વિસ્તારમાં પરત મુક્ત કરવામાં આવશે. મનપા દ્વારા નાગરિકોને આ કામગીરીમાં સહકાર આપવા અપીલ કરવામાં આવી છે.