પાટડીના ગેડિયા, ખેરવા અને ઝેઝરી ગામોમાં અસામાજિક તત્વોની મિલકતો પર ચાલશે બુલડોઝર

સુરેન્દ્રનગર જિલ્લાના પાટડી તાલુકામાં પોલીસ હવે ગુનેગારો સામે લાલ આંખ કરી રહી છે. તાજેતરમાં ગેડિયા, ખેરવા અને ઝેઝરી ગામોમાં PGVCL સાથે મળીને 1.32 કરોડ રૂપિયાની વીજચોરી ઝડપી પાડ્યા બાદ, જિલ્લા પોલીસ વડા (SP) પ્રેમસુખ ડેલુ ફરી એક્શન મોડમાં જોવા મળ્યા છે. તેમણે સ્પષ્ટ આદેશ આપ્યા છે કે આ વિસ્તારના જે તત્વો દારૂ, જુગાર કે અન્ય અસામાજિક પ્રવૃત્તિઓ સાથે જોડાયેલા છે, તેમની તમામ સ્થાવર અને જંગમ મિલકતોની ઝીણવટભરી તપાસ કરવામાં આવશે.

પોલીસ દ્વારા આ શંકાસ્પદ ઈસમોની મિલકતોના દસ્તાવેજો એકત્રિત કરવામાં આવી રહ્યા છે. જો આ મિલકતો ગેરકાયદેસર જણાશે અથવા સરકારી જમીન પર દબાણ હશે, તો વહીવટીતંત્ર દ્વારા તેના પર બુલડોઝર ફેરવી દેવામાં આવશે. આટલું જ નહીં, ગુનાહિત પ્રવૃત્તિઓ માટે વપરાતા વાહનોની પણ સઘન તપાસ કરવામાં આવશે. પૂરતા પુરાવા કે જરૂરી ડોક્યુમેન્ટ વગરના વાહનોને તાત્કાલિક ધોરણે જપ્ત કરી લેવામાં આવશે. પોલીસની આ કડક કાર્યવાહીથી અસામાજિક તત્વોમાં ભારે ફફડાટ વ્યાપી ગયો છે.