ખાતર પર દીવેલ: સુરેન્દ્રનગરમાં ખેડૂતોનું સબસિડીવાળું યુરિયા ફેક્ટરીઓને વેચવાનું મોટું કૌભાંડ ઝડપાયું, 3 સામે ગુનો દાખલ

Urea Fertilizer Scam | સુરેન્દ્રનગર (Surendranagar) જિલ્લાના મૂળી અને વઢવાણ પંથકમાં ખેતીવાડી વિભાગની સંયુક્ત ટીમે એક મસમોટા આર્થિક કૌભાંડ (Financial Scam) નો પર્દાફાશ કર્યો છે.

સરકાર દ્વારા ખેડૂતોને અપાતું સબસિડીવાળું નીમ કોટેડ યુરિયા (Neem Coated Urea) ખાતર ગેરકાયદેસર રીતે ઔદ્યોગિક વપરાશ (Industrial use) માં ડાયવર્ટ કરવાનું રેકેટ ઝડપાયું છે. આ ટોળકી ગરીબ ખેડૂતોના નકલી નામે ઓનલાઇન પી.ઓ.એસ. મશીન (POS Machine) માં બોગસ એન્ટ્રીઓ અને બિલ જનરેટ કરીને કાળાબજાર કરતી હતી.

મૂળી પોલીસ સ્ટેશનમાં (Muli Police Station) આ ગંભીર મામલે શ્રી આશાપુરા ફાઉન્ડેશન (વસ્તડી) ના જવાબદારો સહિત 3 મુખ્ય શખ્સો સામે ગુનો દાખલ કરવામાં આવ્યો છે.

મૂળી પોલીસ પાસેથી મળતી વિગતો મુજબ, વસ્તડીથી મોરબી (Morbi) તરફ શંકાસ્પદ ખાતર ભરીને જતી એક બોલેરો પીકઅપ (Bolero Pickup Wagon) ગાડી નંબર GJ13AX9306 ને વીરપર ચોકડી પાસેથી વોચ ગોઠવીને ઝડપી પાડવામાં આવી હતી.

આ ગાડીમાંથી ક્રિભકો (KRIBHCO) કંપનીની 100 થેલી એગ્રીકલ્ચર ગ્રેડ યુરિયા ખાતર મળી આવ્યું હતું. આ જથ્થા અંગે કોઈ યોગ્ય આધાર ન મળતા ગાડીના ડ્રાઇવર સંજયભાઈ શામજીભાઈ સોનગરા અને દલપતભાઈ ભીખાભાઈ સોનગરાની અટકાયત કરવામાં આવી હતી.

આ ખાતરના સેમ્પલ જુનાગઢ લેબોરેટરીમાં (Laboratory) મોકલવામાં આવતા તે સરકારી સબસિડીવાળું યુરિયા હોવાનો વૈજ્ઞાનિક રિપોર્ટ આવ્યો છે.

કાગળ પર ખેડૂતોએ ખાતર ખરીદ્યું હોવાનું દર્શાવી, વાસ્તવમાં આ સસ્તું ખાતર ઊંચા ભાવે મોરબીની સિરામિક (Ceramic) અથવા અન્ય ફેક્ટરીઓમાં ઇન્ડસ્ટ્રીયલ ગ્રેડ તરીકે વેચી રોકડી કરી લેવાતી હતી. જ્યારે બીજી તરફ વાવેતરની સિઝનમાં સાચા ધરતીપુત્રો એક-એક થેલી ખાતર માટે તરસતા હોય છે ત્યારે વચેટિયાઓ અને ફેક્ટરી માલિકોની મોટી ચેઇન આ કૌભાંડ પાછળ સક્રિય હોવાની આશંકા છે.

આ સિવાય રાસાયણિક ખાતરોનો ઉપયોગ માત્ર ખેતર પૂરતો નહીં, પણ ક્રોકરી, પ્લાસ્ટિક, ફાર્મા અને ફાયર સેફ્ટી જેવા ઉદ્યોગોના રો મટીરિયલ (Raw material) તરીકે પણ મોટા પાયે થતો હોવાનું બહાર આવ્યું છે.