સુરેન્દ્રનગર સ્થાનિક સ્વરાજ્યની ચૂંટણીમાં ભાજપનો માસ્ટરસ્ટ્રોક: અનેક બેઠકો બિનહરીફ થવાના એંધાણ

સુરેન્દ્રનગર જિલ્લામાં સ્થાનિક સ્વરાજ્યની ચૂંટણીના સત્તાવાર મતદાન પૂર્વે જ રાજકીય માહોલ સંપૂર્ણપણે કેસરીયો બની ગયો હોય તેવું જણાય છે. આગામી 15 તારીખે ઉમેદવારી ફોર્મ પરત ખેંચવાનો છેલ્લો દિવસ છે, પરંતુ તે પહેલા જ ભારતીય જનતા પાર્ટીએ આક્રમક રણનીતિ અપનાવીને વિરોધ પક્ષોને ચોંકાવી દીધા છે.

જિલ્લા ભાજપ પ્રમુખ હાર્દિકભાઈ ટમાલીયા અને સ્થાનિક ધારાસભ્યોએ રાતભર મેરેથોન બેઠકો યોજીને એવી વ્યુહરચના ઘડી છે કે અનેક બેઠકો પર વિપક્ષી ઉમેદવારો મેદાન છોડી ફોર્મ પરત ખેંચે તેવી પ્રબળ શક્યતા સેવાઈ રહી છે. શહેરની પ્રથમ મનપા ચૂંટણીના જંગમાં ભાજપે રાતભર બેઠકોનો દોર ચલાવીને વિરોધ પક્ષના સમીકરણો બદલી નાખ્યા છે.

નોંધનીય છે કે, અત્યાર સુધીમાં ધ્રાંગધ્રા નગરપાલિકાની 7, લીંબડીની 1 અને વઢવાણ તાલુકા પંચાયતની 2 બેઠકો મળી કુલ 10 બેઠકો પર ભાજપ બિનહરીફ વિજેતા જાહેર થઈ ચૂક્યું છે.

15 તારીખ પહેલાના આ રાજકીય ખેલને કારણે વિપક્ષી છાવણીમાં સોપો પડી ગયો છે. શહેરી અને ગ્રામ્ય બંને વિસ્તારોમાં ભાજપની મજબૂત પકડ જોતા, મતદાનના દિવસ પહેલા જ વિજયના અનેક આંકડાઓ ભાજપની તરફેણમાં આવે તેવું ચિત્ર સ્પષ્ટ દેખાઈ રહ્યું છે.