Gediya Gang | રાજકોટ રેન્જ આઈ.જી. નિર્લિપ્ત રાયની ટીમે છેલ્લા 4 વર્ષથી પેરોલ રજા પરથી નાસતા ફરતા ગેડીયા ગેંગના કુખ્યાત આરોપી અલી નથુ ડફેરને લખતર તાલુકાના અણિયાળી ગામના તળાવ પાસેથી ઝડપી પાડ્યો છે.
આરોપી અલી નથુ ડફેર વિરુદ્ધ સુરેન્દ્રનગર ઉપરાંત અમદાવાદ, ધંધુકા અને બગોદરા પોલીસ મથકોમાં લૂંટ, ધાડ, ચોરી, પોલીસ પર હુમલો અને ફાયરિંગ જેવા કુલ 61 જેટલા ગંભીર ગુનાઓ નોંધાયેલા છે.
આ કુખ્યાત આરોપી વિરુદ્ધ ગુજસીટોક હેઠળ પણ ગુનો દાખલ થયેલો છે. વર્ષ 2022 માં પેરોલ રજા પર છૂટ્યા બાદ તે સમયસર જેલમાં પરત હાજર થયો ન હતો અને ફરાર થઈ ગયો હતો.
નાસતા ફરતી આ અવધિ દરમિયાન પણ તેણે લખતર, સુરેન્દ્રનગર સીટી બી ડિવિઝન અને નળ સરોવર પોલીસ સ્ટેશન વિસ્તારમાં કુલ 4 ગુના આચર્યા હતા. આ ઉપરાંત, અમદાવાદના સોલામાં પણ તેણે 2 ગુના કર્યા હતા. આમ, તે કુલ 6 ગુનાઓમાં નાસતો ફરતો હતો.
રાજકોટ રેન્જ ટીમના અજયવીર સિંહ ઝાલા, યોગેન્દ્રસિંહ ચુડાસમા, ધર્મેન્દ્રસિંહ વાઘેલા, હિતેશભાઈ જોગરાણા, દિલીપસિંહ સિંધવ અને રાજુભાઈ પઢેરિયાએ લાંબા સમયથી વોન્ટેડ એવા આ આરોપીની ગોબર તળાવની પાળ પાસેથી ઝડપી લીધો હતો.
પોલીસે આરોપીની કાયદેસરની અટકાયત કરી લખતર પોલીસ સ્ટેશનને સોંપ્યો છે. આગળની કાર્યવાહી હાથ ધરવામાં આવી રહી છે.
