સુરેન્દ્રનગર જિલ્લા ગ્રામ વિકાસ એજન્સીનું બિલ્ડિંગ જર્જરિત: ભયના ઓછાયા હેઠળ કામ કરતા કર્મચારીઓ

સુરેન્દ્રનગર કલેક્ટર કચેરી કમ્પાઉન્ડમાં આવેલું જિલ્લા ગ્રામ વિકાસ એજન્સીનું મકાન અત્યંત જર્જરિત હાલતમાં પહોંચી ગયું છે.

વર્ષો જૂની આ ઇમારતની છત અને દીવાલોમાંથી હવે પોપડા ખરવા લાગ્યા છે અને અંદરના લોખંડના સળિયા પણ સ્પષ્ટ દેખાવા લાગ્યા છે.

આ બિલ્ડિંગમાં નાયબ ચિટનીસ, મિશન મંગલમ, પ્રધાનમંત્રી આવાસ યોજના, સ્વચ્છ ભારત મિશન તેમજ ડીપીસી વિભાગ સહિતની અનેક મહત્વપૂર્ણ શાખાઓ કાર્યરત છે.

અહીં વર્ગ-1ના અધિકારીઓ સહિત અનેક કર્મચારીઓ ફરજ બજાવે છે, જેઓ અન્ય કોઈ યોગ્ય બેઠક વ્યવસ્થા ન હોવાને કારણે ભારે ભય વચ્ચે નોકરી કરવા મજબૂર બન્યા છે.

એક તરફ તંત્ર દ્વારા શહેરી વિસ્તારમાં આવેલી જર્જરિત અને ભયજનક ઇમારતોને ઉતારી લેવાની કડક કાર્યવાહી હાથ ધરવામાં આવે છે, તો બીજી તરફ સરકારી કચેરી પોતે જ આવી દયનીય સ્થિતિમાં ચાલી રહી છે. કોઈ મોટી દુર્ઘટના સર્જાય તે પહેલાં આ કચેરીને અન્ય સુરક્ષિત સ્થળે ખસેડવામાં આવે તેવી માગ ઉઠી રહી છે.