સુરેન્દ્રનગર કલેકટર કચેરી નજીક જર્જરિત સરકારી બિલ્ડીંગ તોડતા સમયે કાટમાળ વૃક્ષ-વીજ પોલ પર પડયો

Surendranagar | સુરેન્દ્રનગર કલેકટર કચેરી પાસે જૂના સરકારી ક્વાર્ટર્સ અને જર્જરિત કચેરીઓ તોડી પાડવાની કામગીરી દરમિયાન મોટી દુર્ઘટના સર્જાઈ હતી. ધોબી સોસાયટી નજીક જ્યારે કોન્ટ્રાક્ટ એજન્સી દ્વારા બિલ્ડીંગ તોડવામાં આવી રહી છે.

દરમિયાન શનિવારના રોજ બિલ્ડીંગનો ઉપરનો ભાગ બાજુમાં આવેલી સોસાયટી તરફ નમી પડયો હતો. આ ઘટનાને કારણે સોસાયટીના માર્ગો બ્લોક થઈ ગયા હતા અને અનેક વૃક્ષો ધરાશાયી થયા હતા.

બિલ્ડીંગનો કાટમાળ વીજ થાંભલાઓ પર પડતા સમગ્ર વિસ્તારનો વીજ પુરવઠો ખોરવાઈ ગયો હતો. દુર્ઘટના સમયે એક વાહનચાલક નીચે દટાયો હતો, જેને સ્થાનિકોએ સહીસલામત બહાર કાઢતા મોટી જાનહાનિ ટળી હતી. ઘટના બાદ પીજીવીસીએલ અને આરએમબી વિભાગની ટીમો તાત્કાલિક સ્થળ પર દોડી ગઈ હતી. કોન્ટ્રાક્ટ એજન્સીના અધિકારીઓએ સ્થળ મુલાકાત લઈ પરિસ્થિતિનો તાગ મેળવ્યો હતો અને વીજ પુરવઠો યથાવત કરવાની કામગીરી હાથ ધરી હતી.