સુરેન્દ્રનગર લેક્ટરે ચુડાના વેળાવદર આંગવાડી મુલાકાત લીધી, ભોજનનો સ્વાદ ચાખ્યો

સુરેન્દ્રનગર જિલ્લા કલેક્ટર જી.એચ. સોલંકી દ્વારા ચુડા તાલુકાના વેળાવદર ગામે આવેલી આંગણવાડીની અચાનક મુલાકાત લેવામાં આવી હતી. આ આકસ્મિક તપાસ દરમિયાન કલેક્ટરે આંગણવાડીના બાળકોને પીરસવામાં આવતા ભોજનની ગુણવત્તાની જાતે ચકાસણી કરી હતી. તેમણે ખુદ ભોજનનો સ્વાદ માણીને આહાર પૌષ્ટિક અને બાળકો માટે યોગ્ય છે કે નહીં તેની ખાતરી કરી હતી.

મુલાકાત દરમિયાન આંગણવાડીમાં બાળકોની હાજરી ઓછી જણાતા કલેક્ટરે નારાજગી વ્યક્ત કરી હતી. તેમણે સંચાલકોને આગામી દિવસોમાં વધુમાં વધુ બાળકો હાજર રહે અને સરકારી યોજનાઓનો લાભ લે તે માટે સૂચના આપી હતી. આ ઉપરાંત બાળકોને સમયસર અને ગુણવત્તાસભર પૌષ્ટિક આહાર મળી રહે જેથી વિસ્તારનું કોઈ પણ બાળક કુપોષિત ન રહે તેવી ખાસ તકેદારી રાખવા જણાવ્યું હતું.

કલેક્ટરની આ અચાનક મુલાકાતથી આંગણવાડીના સ્ટાફમાં દોડધામ મચી ગઈ હતી. તપાસ દરમિયાન તેમણે આંગણવાડીમાં હાજર બાળકો સાથે પણ વાતચીત કરીને વિવિધ વિગતો મેળવી હતી. કલેક્ટરે આંગણવાડી સંચાલકોને ભોજનની ક્વાલિટીમાં સતત સુધારો લાવવા અને યોગ્ય સુવિધાઓ સુનિશ્ચિત કરવા આદેશ આપ્યા હતા.