સુરેન્દ્રનગરની ભોગાવો નદીમાં બેફામ રેતી ચોરી, તંત્રની મૌન સંમતિ સામે રોષ

Bhogavo River Mining | સુરેન્દ્રનગર શહેરમાંથી પસાર થતી ભોગાવો નદીના પટમાં ખનીજ માફિયાઓ દ્વારા બેફામ રીતે ગેરકાયદેસર રેતી ચોરી ચલાવવામાં આવી રહી છે. વઢવાણ, જોરાવરનગર અને સુરેન્દ્રનગર શહેરની મધ્યમાંથી વહેતી નદીમાં દિનદાહાડે ખોદકામ કરી રેતીની ચોરી કરવામાં આવી રહી છે, છતાં ખાણ ખનીજ વિભાગ, પોલીસ અને વહીવટી તંત્ર આ ગેરકાયદે પ્રવૃત્તિ અટકાવવામાં સંપૂર્ણપણે નિષ્ફળ નીવડ્યા છે.

સ્થાનિક સંગ્રહખોરો દ્વારા ભોગાવો નદીના ભરેલા પાણીમાં ટ્રેક્ટરો ઉતારીને ગેરકાયદે રસ્તાઓ બનાવી દેવામાં આવ્યા છે. વઢવાણથી સુરેન્દ્રનગર વચ્ચેના નદીના પટમાં દરરોજ 20 થી પણ વધુ ટ્રેક્ટરો મારફતે રેતી ભરીને ખુલ્લેઆમ વેચાણ કરવામાં આવી રહ્યું છે. જેનાથી માફિયાઓ લાખો રૂપિયાની કમાણી કરી રહ્યા છે. ગ્રામીણ વિસ્તારોમાં રેતી ચોરી પર કડકાઈ થતાં રેતીના ભાવ આસમાને પહોંચ્યા છે, જેના કારણે હવે શહેરી વિસ્તારની નદીને લક્ષ્યાંક બનાવવામાં આવી છે. દરરોજ આ જ માર્ગ પરથી અધિકારીઓ પસાર થતા હોવા છતાં કોઈ કાર્યવાહી ન થતાં તંત્રની ભૂમિકા સામે સવાલો ઉઠ્યા છે. સ્થાનિકોએ તાત્કાલિક દરોડા પાડી ખનીજ ચોરી અટકાવવા માંગ કરી છે.