પાટડી નગરપાલિકા દ્વારા શહેરની મુખ્ય બજારમાં ટ્રાફિકની સમસ્યા હળવી કરવા માટે સઘન દબાણ હટાવો ઝુંબેશ હાથ ધરવામાં આવી છે. લાંબા સમયથી બજારના મુખ્ય માર્ગો પર શાકભાજી, ફ્રુટ અને અન્ય ચીજવસ્તુઓનું વેચાણ કરતા લારી ધારકોને કારણે અવારનવાર ટ્રાફિક જામ સર્જાતો હતો, જેનાથી સ્થાનિક રહીશો અને વાહનચાલકો પરેશાન હતા.
નગરપાલિકાના વહીવટદાર અને ઉચ્ચ અધિકારીઓની સૂચના બાદ દબાણ શાખાની ટીમ હરકતમાં આવી હતી અને માર્ગ પર ઉભેલી લારીઓને દૂર કરી રસ્તો ખુલ્લો કરાવ્યો હતો.
આ કામગીરી દરમિયાન માત્ર લારી ધારકો જ નહીં, પરંતુ દુકાનની બહાર સામાન રાખી માર્ગ રોકનાર વેપારીઓને પણ કડક સૂચના આપવામાં આવી હતી. પાટડી નગરપાલિકાના અધિકારીના જણાવ્યા અનુસાર, હાલ પ્રાથમિક તબક્કે લારીઓ હટાવવાની કામગીરી કરવામાં આવી છે, પરંતુ આગામી દિવસોમાં પાકા દબાણો અને ગેરકાયદેસર બાંધકામો સામે પણ કડક કાર્યવાહી કરવામાં આવશે.
તંત્રની આ આક્રમક કામગીરીથી બજારમાં અવરજવર કરતા લોકોએ રાહતનો શ્વાસ લીધો છે. પાલિકાની આ ઝુંબેશને પગલે દબાણકર્તાઓમાં ફફડાટ વ્યાપી ગયો છે.
