લીંબડીમાં ‘વિશ્વ ક્ષય દિવસ’ની ઉજવણી: ટીબી મુક્ત ભારત અભિયાન અંતર્ગત જનજાગૃતિ રેલી યોજાઈ

સુરેન્દ્રનગર જિલ્લાના લીંબડી ખાતે આવેલી આર.આર. હોસ્પિટલમાં તાલુકા હેલ્થ કચેરી દ્વારા 24 માર્ચના રોજ ‘વિશ્વ ક્ષય દિવસ’ (World TB Day) ની ઉત્સાહભેર ઉજવણી કરવામાં આવી હતી. આ વર્ષે ‘ટીબી મુક્ત ભારત’ અભિયાનને વેગ આપવાના ઉમદા હેતુથી વિવિધ જનજાગૃતિલક્ષી કાર્યક્રમોનું આયોજન કરાયું હતું.

કાર્યક્રમના ભાગરૂપે એ.એન.એમ. (ANM) નર્સિંગ કોલેજના વિદ્યાર્થીઓ અને હોસ્પિટલના ઉચ્ચ અધિકારીઓ દ્વારા એક વિશાળ રેલી કાઢવામાં આવી હતી, જેમાં સૂત્રોચ્ચાર દ્વારા લોકોને ટીબીના લક્ષણો અને તેની સારવાર અંગે માહિતગાર કરવામાં આવ્યા હતા.

આ પ્રસંગે લીંબડી સબ ડિસ્ટ્રિક્ટ હોસ્પિટલ (SDH) ના અધિક્ષક, RMO તથા તાલુકા હેલ્થ વિભાગના વિવિધ તબીબો ખાસ ઉપસ્થિત રહ્યા હતા. કાર્યક્રમ દરમિયાન તબીબોએ જણાવ્યું હતું કે ટીબી એ મટી શકે તેવો રોગ છે અને સમયસર નિદાન તેમજ સંપૂર્ણ સારવાર લેવી અનિવાર્ય છે.

આ આખા આયોજનને સફળ બનાવવા માટે લીંબડી તાલુકા હેલ્થ સુપરવાઈઝર મનોજભાઈ ભટ્ટ, ટીબી સુપરવાઈઝર હેમંતભાઈ અને હિતેશભાઈ સહિતના સમગ્ર હેલ્થ સ્ટાફે ભારે જહેમત ઉઠાવી હતી. આ રેલી દ્વારા શહેરના નાગરિકોમાં આરોગ્ય પ્રત્યે સભાનતા લાવવાનો સફળ પ્રયાસ કરવામાં આવ્યો હતો.