ધ્રાંગધ્રાની કારદારની શેરીમાંથી વરલી મટકાના જુગાર રમાડતો શખ્સ ઝડપાયો

ધ્રાંગધ્રા શહેરમાં અસામાજિક પ્રવૃત્તિઓ નાબૂદ કરવા માટે સિટી પોલીસ એક્શન મોડમાં આવી છે. ધ્રાંગધ્રા સીટી પોલીસ મથકનો સર્વેલન્સ સ્ટાફ જ્યારે વિસ્તારમાં પેટ્રોલિંગ કરી રહ્યો હતો, ત્યારે તેમને ચોક્કસ બાતમી મળી હતી કે શહેરની કારદારની શેરીમાં એક શખ્સ જાહેરમાં વરલી મટકાનો જુગાર રમાડી રહ્યો છે. આ માહિતીના આધારે પોલીસે તાત્કાલિક દરોડો પાડી જુગારધામનો પર્દાફાશ કર્યો હતો.

પોલીસની આ રેઇડ દરમિયાન ઇમરાનભાઈ યુનુશભાઈ મલેક નામનો શખ્સ વરલી મટકાના આંકડા લખતો રંગેહાથ ઝડપાઈ ગયો હતો. પોલીસે ઘટનાસ્થળેથી વરલી મટકાનું જુગાર સાહિત્ય અને રોકડ રકમ 2,220 રૂપિયા કબજે કરી છે. આરોપી વિરુદ્ધ જુગાર ધારા હેઠળ ગુનો નોંધી આગળની કાયદેસરની કાર્યવાહી હાથ ધરવામાં આવી છે.