લીંબડી પ્રાંત અધિકારી કુલદીપ દેસાઈનો વિદાય અને સન્માન સમારોહ

Kuldip Desai Farewell | લીંબડીના મનદીપ પાર્ટી પ્લોટ ખાતે પ્રાંત અધિકારી કુલદીપ દેસાઈ (Kuldip Desai)નો વિદાય અને સન્માન સમારોહ યોજાયો હતો. લીંબડી વેપારી એસોસિએશન, પ્રાંત કચેરીના કર્મચારીઓ અને વિવિધ સમાજના અગ્રણીઓના સંયુક્ત ઉપક્રમે આ કાર્યક્રમ યોજાયો હતો.

કુલદીપ દેસાઈની અમદાવાદ ખાતે બદલી થતાં તેમને વિદાયમાન આપવામાં આવ્યું હતું. તેમણે લીંબડી, ચૂડા અને સાયલા તાલુકામાં 2 વર્ષથી વધુ સમય સુધી સેવા આપી હતી.

આ સમયગાળા દરમિયાન વહીવટી ક્ષેત્રે કરેલી શ્રેષ્ઠ કામગીરી અને જનહિતના નિર્ણયોને શહેરીજનોએ બિરદાવ્યા હતા. વેપારી મંડળ અને અગ્રણીઓ દ્વારા પાઘડી, સાફો, શાલ અને સ્મૃતિચિહ્ન અર્પણ કરીને તેમનું ભાવભર્યું સન્માન કરાયું હતું.

આ પ્રસંગે ધારાસભ્ય કિરીટસિંહ રાણા સહિતના અગ્રણીઓએ ઉપસ્થિત રહીને તેમને શુભકામનાઓ પાઠવી હતી. પ્રાંત અધિકારીએ મળેલા અભૂતપૂર્વ સહકાર બદલ તમામનો આભાર વ્યક્ત કર્યો હતો.